Tucomics. Titoriais de electrónica en banda deseñada

O formato de banda deseñada é moi interesante para comunicar calquera contido de forma fácil. Ben o saben Aitor Aloa e Ibon Sánchez, que están a buscar financiamento e colaboración para poder levar a cabo o seu proxecto: Tucomics.

Necesitan entre 4000 e 8000 € para realizar un primeiro traballo consistente en dez titoriais sobre electrónica, hardware libre e fabricación propia en formato de banda deseñada. Por exemplo, explicarannos que é o hardware libre, o código das resistencias, os símbolos electrónicos, como soldar con estaño, como utilizar un multímetro ou unha breadboard, etc.

O cómic resultante estará a disposición online, en formato web e pdf, baixo licenza Creative Commons, para poder reproducilos, modificalos, traducilos, distribuílos, etc. Eu xa me ofrecin para traducir ao galego.

Quédalles moi pouquiño para chegar ao mínimo e acábaselles o tempo! Se che interesa o traballo podes colaborar no proxecto a través de goteo.org

Hai outros exemplos de electrónica en banda deseñada:


DoCircuits, un novo simulador online

Hai tempo que falei aquí do simulador de circuítos CircuitLab, e grazas a un comentario que chegou hoxe a aquel artigo coñecín outro simulador: DoCircuits.

É bastante limitado e bótanse en falta moitas cousas para que resulte útil, pero supoño que pouco a pouco irán ampliando as súas funcionalidades, pois acaban de empezar. Permite introducir nos circuítos un xerador de funcións e conectar un osciloscopio para visualizar o sinal, o cal é bastante interesante.

Non están mal os exemplos que xa veñen feitos de rectificadores e amplificadores.

Botádelle unha ollada se vos interesa usalo. Eu para educación secundaria aínda estou agardando a que a alguén se lle ocorra facer algo similar aos fantásticos Crocodile Technology ou Yenka, pero para traballar vía navegador desde calquera plataforma. A ver se algún día o vemos.

[youtube: Getting Started with Do Circuits]


ElectroDroid. Electrónica no teu Android.

Se tes un teléfono con SO Android e es estudante ou profesional da electrónica seguramente te gustará a aplicación ElectroDroid que podes descargar de balde.

Aínda que moitos dos recursos que ofrece excedan as necesidades dos estudantes de Educación Secundaria, podemos sacarlle partido a moitas ferramentas.

Por exemplo, inclúe calculadoras do código de cores das resistencias, da Lei de Ohm, divisores de voltaxe, da resistencia equivalente de sistemas en serie e paralelo ou da frecuencia e tempo de disparo dun temporizador 555.

Tamén inclúe táboas de datos moi útiles para clase: Símbolos electrónicos, valores de resistividade e condutividade, táboas de verdade das portas lóxicas, álxebra de Boole ou os pins dos integrados da serie 7400.

Pódense instalar novos plugins, coma un pequeno simulador de circuítos “EveryCircuit“. Non é gran cousa, polo menos a versión free que probei, pero para levar no peto está moi ben. Inclúe animacións e sinal de osciloscopio.


Bending Fest no Alg-a Lab en Vigo

Se vos apetece pasar unha fin de semana montando instrumentos musicais electrónicos podedes apuntarvos aos obradoiros de electrónica musical Bending Fest impartidos polo colectivo Familiar no Alg-a Lab, en Valadares (Vigo) do 27 ao 29 de xullo.

[youtube: La Invisible – Malaga Oct-2011]

Podedes elixir entre diferentes módulos, que se levarán a cabo durante as tres xornadas. O prezo inclúe todo o material necesario para a construción dos instrumentos. Tedes aquí máis información sobre o funcionamento de cada un.

  • 6DE, Punksstylo: 60€
  • Theremín: 70€
  • Pedales: 50€
  • Circuit Bendig: 35€
  • Drawdio: 35€

 

Máis información:

 

Tamén haberá concertos, acampada, bar, …


Esquemáticos: gráficas expandidas funcionais

Acabo de descubrir o traballo “Esquemáticos” da artista mexicana Amor Muñoz.

A instalación consiste nunha serie de diagramas de circuítos electrónicos analóxicos bordados a man sobre teas de gran tamaño (300 x 150 cm). As pezas inclúen os compoñentes electrónicos reais, que están interconectados entre si mediante fío condutor pola parte posterior, de maneira que os circuítos son completamente funcionais e poden ser operados polo público.

[Esquemáticos from Amor Munoz on Vimeo.]

Estes son os circuítos da instalación:

  • Un alcolímetro mide o nivel de alcol no alento do participante. Se o nivel é baixo apenas acenderanse uns LEDs, pero se é alto soará a sirena dunha ambulancia. Para iso utiliza unha serie de amplificadores operacionais que actúan como comparadores. Para axudar ao público a probar o circuíto proporciónaselles un grolo de tequila.
  • Un sensor de audio conectado a un relé fai que funcione e se apague un vello tocadiscos.
  • Un circuíto integrado 555 crea oscilacións de son en resposta aos debuxos que realiza a xente cun lapis de grafito. Está baseado no xa coñecido por nós Drawdio.
  • Un órgano electrónico conta con 8 pulsadores que corresponden á escala musical.
  • Un sensor de frecuencia cardíaca que activa un LED e un altofalante seguindo o ritmo do pulso da participante.

 
Gústame moito a idea para levar a cabo no instituto aproveitando que en 4º de ESO hai un bloque de contidos adicado á electrónica. Habería que buscar unha parede axeitada para realizar unha instalación. Xa veremos para o curso que vén.
 
En palabras da artista:
“O debuxo comunmente é entendido como un medio de representación gráfica bidimensional que ten como fin a transmisión de información, mensaxes, ideas, etc. Neste caso interésame abordar ao debuxo como un sistema expansible e funcional. Por tal motivo encontro un interese particular no debuxo electrónico, pola súa calidade técnica e por ser unha estrutura universal de representación e significacións mediante símbolos gráficos, que proporcionan datos para a análise, deseño e elaboración de artefactos.”