Internet

Cousas que atopamos pola rede

Afundímonos?

por

Galiza afundidaQue pasaría se na costa de Galicia segue subindo o nivel do mar na proporción en que o leva facendo os últimos dez mil anos?

Voz Natura ofrécenos un simulador (.kmz) no que podemos visualizar como quedaría a costa galega co paso dos anos (ou máis ben séculos). Necesitas ter instalada a última versión de Google Earth.

Clica aquí e comproba en que ano a túa casa quedaría baixo o mar movendo a liña de tempo que atoparás na marxe superior de google earth.

Supoño que non haberá que tomarse estas imaxes á tremenda, nin afirmar que iso vaia ser así, xa que é imposible facer unha predición a tan longo prazo, e algo de ciencia ficción si que parece, pero non está de máis concienciarse sobre a necesidade de frear o quecemento global do planeta e, por que non?, pasar un bo rato mirando como a nosa casa queda afundida baixo as augas do Atlántico.

Por curiosidade: Baiona desaparece, pero o instituto aguanta en pé!


Creative Commons: Sexa creativ@.

por

Creative commonsHoxe lin unha nova en vieiros: A licenza Creative Commons cumpre 5 anos.

Quen non se alimentou durante anos dos contidos de internet, descargando, copiando e modificando contidos atopados na rede para utilizalos nas nosas clases? E refírome tanto a profes como a alumnos/as. Quen non aprendeu a programar grazas aos códigos libres que atopamos co noso navegador? Quen non atopou información instantaneamente cunha simple procura en Google? Se internet constitúe esta enorme fonte de información e recursos é grazas a toda a xente que crea e publica material na rede.

Non deberiamos participar nós con todo ese material que temos feito? Hai unha maneira de facelo moi interesante: Creative Commons, unha forma de intercambio de expresión, coñecemento e arte mediante un conxunto de licenzas na web sen custo algún.

Pola razón que sexa, hai moita xente que quere compartir, reutilizar, modificar e distribuír o seu traballo, e tamén ter a liberdade de compartir, reutilizar, adaptar e distribuír un traballo baseado noutro xa existente. Creative Commons permite que se fagan usos creativos das obras e que as persoas se beneficien delas, como material a utilizar directamente ou como plataforma de creación de novos contidos.

Na miña opinión, no ámbito educativo habería que facer un esforzo en darlle un impulso aos recursos e ferramentas libres. A política de gratuidade de libros de texto, por exemplo, non axuda precisamente a isto, e moito menos a favorecer a creatividade.

Aquí tes unha aplicación flash na que se explica a filosofía de creative commons.