tecnoloxia.org

Tecnoloxía na Educación Secundaria

Ciencia Clip, un concurso de vídeos divulgativos

Ciencia ClipCienciaClip_logo-v2 é un concurso de vídeos divulgativos de ciencia e tecnoloxía deseñados, producidos e protagonizados por estudantes de ESO, Bacharelato e dos ciclos básico e medio de Formación Profesional. O obxectivo do concurso é fomentar o interese pola ciencia e a tecnoloxía, e ofrecer aos concursantes unha oportunidade para exercitar a súa creatividade e habilidades comunicativas usando ferramentas que proporciona internet.

Poderase participar de dúas maneiras, a nivel individual ou en equipo de 3 membros como máximo. Hai que gravar e editar un vídeo divulgativo que dure entre 3 e 5 minutos, subilo a YouTube ou Vimeo e inscribirse enchendo un formulario antes do 17 de abril. Pódese gravar en calquera das linguas oficiais do estado español ou en inglés, así que animádevos a facelo en galego.

Robot-dron Erle SpiderCales son os premios? Ademais da viaxe e estancia de hotel para asistir á sesión do sábado de Naukas Bilbao 2016, na categoría individual podedes gañar un kit completo para a construción e manexo dun Robot-dron Erle Spider, e se recibides o premio especial do xurado podedes gañar unha visita ao CERN, en Xenebra. Non está nada mal!

Aquí tendes o vídeo de presentación do concurso:

[youtube:¡Participa en Ciencia Clip!]

Ciencia Clip é unha iniciativa da Cátedra de Cultura Científica da UPV/EHU, patrocinada pola Deputación Foral de Bizkaia e na que colaboran o grupo Big Van e a plataforma de divulgación científica Naukas.

Tedes toda a información na web de Ciencia Clip.…

Concurso Espacial 2010. Navegación por satélite.

concursoespacial.jpgNa edición deste ano o Concurso Espacial ten como lema a navegación por satélite. Está dirixido a estudantes de segundo ciclo de ESO, bacharelato e ciclos de formación profesional de grao medio.

Pódense presentar traballos de robótica espacial, investigación, experimentación, narrativa-banda deseñada e animación, sempre en relación co tema deste ano. O prazo de presentación é dende o 1 de xaneiro ata o 28 de febreiro de 2010.

Os equipos gañadores poderán participar nun campamento espacial de 10 días en Madrid e Granada, que inclúe obradoiros de robótica, construción de cohetes, observación astronómica, coloquios con persoas expertas en ciencia e tecnoloxía, visitas a estacións da NASA e ESA e ao parque das ciencias de Granada. Dende logo que o premio ten moi boa pinta.

Máis información en www.concursoespacial.com

Obradoiro “A Maxia da Robótica” e II Concurso galego de Robótica

lego_escorpion.gifNa Semana da Ciencia 2009, a Institución Galega de Ciencia (IGACIENCIA) organiza o Obradoiro ‘A Maxia da Robótica’ e o II Concurso galego de Robótica

O hardware utilizado será Lego Mindstorms.

  • Datas: do 9 ao 14 de novembro de 2009
  • Lugar: Casa das asociacións. Avenida de Vilagarcía, 43, Santiago

Máis información e inscrición en IGACIENCIA

– – – – –

Actualización 17/10/09: a actividade ten unha duración de só unha hora, e consiste en prácticas básicas cos robots de Lego, polo que non compensa ir co alumnado de Baiona que se tería que desprazar a Santiago. Ademais xa dispoñemos de robots Lego cos que traballar.

A convocatoria pode ser de interese para os centros de Santiago e arredores, ou centros que non dispoñan de robots Lego e queiran probalos.…

Concurso de Software Libre

concursoSL.pngPor se a alguén lle interesa, o Concurso Universitario de Software Libre é un concurso de desenvolvemento de software, hardware e documentación técnica libre, no que poden participar estudantes universitarios, de bacharelato ou ciclos de formación profesional de grao medio e superior no ámbito estatal español.

Para liberar os proxecto usarase forxa de RedIRIS e un blogue onde cada participante contará a súa experiencia no desenvolvemento durante o curso escolar 2009/2010.

Podes ver aquí as bases da convocatoria.
O prazo de inscrición remata o 7 de novembro

(Grazas Josek pola información)

Campaña publicitaria para inventos históricos

Divu*Ciencia pon en marcha o concurso invent-AD, con dúas modalidades, unha destinada ao público en xeral e outra destinada ao alumnado de ESO, Bacharelato e Formación Profesional, no que se buscan eslóganes e anuncios para algúns dos inventos e achados científicos que nunca tiveron campaña de publicitaria e que revolucionaron a sociedade: a penicilina, a roda, o telescopio, o microscopio, a lámpada, a máquina de vapor, o teléfono e o papel.

Propóñense tres categorías de participación: póster, cuña de radio ou anuncio de TV, en calquera das linguas oficiais do Estado.

De todos os proxectos participantes elixiranse tres gañadores, un para cada categoría, que recibirán un premio de 1.500 € a gastar na mellora do equipamento do centro.

O prazo de inscrición e entrega de traballos finaliza o 30 de novembro de 2009.

Tes toda a información e bases da convocatoria en concursoinventad.com

invent-ad.png