Revoltallo de termos. A tecnoloxía en Galego.

Listaxe de termos.

Para calquera suxesión ou corrección dos datos engadidos escribide un comentario no post da actividade

Ordear por · [data] · [alfabético] · [especialidade]

Páxina 1 2 3 4 5 6 7 8 9 10 11 12 13 14 15 · Seguinte
Listadas 15 dun total de 212 ordeadas por número

Todas A B C D E F G H I J K L M N O P Q R S T U V W X Y Z


Engrenaxe (Mecánica) Denomínase engrenaxe ou rodas dentadas ao mecanismo utilizado para transmitir o movemento dun compoñente a outro dentro dunha máquina. Ao moverse unha engrenaxe, os seus dentes empurran aos dentes doutra roda engrenada, provocando o seu movemento en sentido contrario. Máis información

Convertedor A/D (Electrónica) Un convertedor é un dispositivo electrónico encargado de transformar un sinal analóxico nun sinal dixital e viceversa. O convertedor analóxico/dixital utilízase, por exemplo, nun termómetro dixital, xa que debemos transformar o sinal analóxico da temperatura nun sinal dixital que se poida amosar na pantalla. O convertedor dixital/analóxico necesitámolo, por exemplo, para poder escoitar música dun CD. O sinal dixital gravado no CD transfórmase nun sinal eléctrico analóxico que vai aos altofalantes.

Parafuso (Mecánica) Un parafuso é unha peza composta por unha pequena barra roscada e unha extremidade que permite facela xirar para que penetre noutra peza ou unha porca. Utilízase como elemento de unión. Un desaparafusador é unha ferramenta que serve para aparafusar ou desaparafusar.

Banda larga (Comunicación) Conxunto de tecnoloxías que permiten a transmisión integrada e simultánea de diferentes tipos de información a unha velocidade suficiente para o acceso a un ou varios servizos multimedia. Por exemplo, suficiente para cursar simultaneamente os sinais de telefonía, datos e TV. En castelán: banda ancha. En portugués: banda larga .En inglés: broadband

Canzorro (Estruturas e Arquitectura) Elemento de pedra en beirado sobre o que tradicionalmente se apoia unha cornixa e que, posteriormente, pasou tamén a designar un beirado sobre o que se apoia unha trabe de madeira. Máis información

Ancho de feixe (Comunicación) Ángulo en graos medido entre os puntos do lóbulo principal de media potencia, ou -3 dB, con respecto á máxima potencia radiada efectiva, podendo estar indicado tanto con respecto ao plano horizontal coma ao plano vertical do diagrama de radiación da antena. Máis información

Mans libres (Comunicación) Chámanse mans libres aos dispositivos que se empregan para falar por teléfono sen ter a necesidade de usar as mans nin ter que soster os aparellos xunto á cabeza. Existen diferentes tipos de mans libres, uns que usan cascos auriculares e outros que empregan un altofalante para aumentar o volume da voz. Máis información

Trencha (Ferramentas) Ferramenta de carpinteiro para desbasta-la madeira, formada por un mango e unha folla plana de metal, grosa e longa, afiada no extremo. Máis información

Cegoñal ou Veo de manivelas (Mecánica) Eixo con cóbados que transforma, nos motores de certas máquinas, o movemento alternativo das bielas en movemento circular, cedéndoo á transmisión. Soen fabricarse de aliaxes ben resistentes e poden ter perforacións para o paso de lubricante. Máis información

Operador Móbil Virtual (OMV) (Comunicación) Un Operador Móbil Virtual ou OMV (en inglés, Mobile Virtual Network Operator o MVNO) é unha compañía de telefonía móbil que non posúe unha concesión de espectro de frecuencia, e polo tanto carece dunha rede propia de radio. Para dar servizo, debe recorrer á cobertura de rede doutra empresa (ou empresas) con rede propia (un Operador Móbil con Rede, ou OMR) coa(s) que debe subscribir un acordo. Máis información

Sen fíos (Comunicación) Chámase sen fíos á comunicación que non se transmite por cables, senón a través de ondas electromagnéticas, coma por exemplo a radio, as emisións televisivas, os sistemas wifi ou o sistema bluetooth. Cando a comunicación se realiza a través dunha conexión física por cables chámase comunicación con fíos. Máis información

GNU (Informática) GNU é o sistema operativo desenvolvido polo proxecto GNU. O proxecto inclúe exclusivamente aplicacións libres, con licenzas que permiten as 4 liberdades da licenza GPL, e polo tanto facilitan o código fonte e permiten a súa modificación. Actualmente a única versión estable do sistema é GNU/Linux, que utiliza o cerne Linux. GNU pronúnciase "ñu" en galego, aínda que o máis habitual é deletrealo ("gue ene u"). Máis información

Aliaxe (Materiais) Unha aliaxe é unha mestura homoxénea ou unha disolución sólida dun metal con outros elementos que conserva o aspecto e as propiedades dun metal. Porén, as propiedades mecánicas tales como a dureza, ductilidade, tenacidade, etc poden ser moi diferentes das dos metais puros, e de aí o seu interese industrial. Exemplos: Aceiro (ferro e carbono), Bronce (cobre e estaño), Latón (cobre e cinc) Máis información

Trade (Ferramentas) É un aparello que serve para facer buratos en distintos materiais mediante un elemento chamado broca.

Escuadros (Estruturas e Arquitectura) Son elementos que se utilizan para fixar un andel á parede ou ben reforza-la unión de dúas pezas de madeira.