tecnoloxia.org

Tecnoloxía na Educación Secundaria

CAD 3D online

OnshapeManA tendencia das aplicacións de todo tipo é que se executen desde un navegador e gardemos e compartamos os ficheiros na nube, permitindo que poidamos traballar desde calquera lugar, con calquera dispositivo e con calquera sistema operativo. Isto non vai ser menos para o deseño CAD.

Estas últimas semanas ando a fedellar cunha aplicación moi interesante e con moitas posibilidades: Onshape. Para usala basta con dispoñer dun ordenador, una conexión a internet e un navegador. As posibilidades son moi amplas: deseños CAD 2D sinxelos, deseño de pezas 3D exportables en STL para imprimir nunha impresora 3D e animacións de sistemas mecánicos.

Aquí tedes un exemplo de traballo con Onshape:

[youtube: Part Studios in Onshape]

Outra aplicación interesante que descubrín hai pouco é tinkercad. É máis sinxela e menos profesional que Onshape, pero para a ESO ten moitas posibilidades. Botádelle unha ollada.

Claro que nos centros de ensino deberían actualizar os equipos (a última dotación que temos son os DELL do 2006) e mellorar as conexións a internet. Non soluciona nada a última dotación de encerados interactivos en todas as aulas cando temos serias limitacións nos equipos para o alumnado e na conexión a internet. A prioridade en dotacións non debería ser a instalación de encerados para que o alumnado mire para eles, senón equipos informáticos cos que poida traballar e un ancho de banda decente, non?

Veña, a debuxar!…

Impresora 3D de vidro

A impresión 3D entra no mundo da fabricación de obxectos de vidro mediante o método 3DGP do MIT Media Lab.

glass.2x519.gifA impresora consta dunha cámara de calor que almacena e proporciona o material fundido a máis de 1000ºC e dunha cámara inferior que se encarga de ir arrefriando a estrutura de maneira controlada. Posúe un dosificador especial composto por circonio, alúmina e sílice capaz de soportar ditas temperaturas e evitar que o vidro fundido se adhira.

Este novo proceso de fabricación permite axustar a xeometría creando estruturas que non serían posibles con métodos tradicionais, e permite ademais controlar as propiedades ópticas do vidro, abrindo un feixe de posibilidades.

Mirade este vídeo:

[GLASS from Mediated Matter Group on Vimeo.]

Impresión 3D dunha ponte de aceiro

Cando pensamos nunha impresora 3D o primeiro que nos vén a cabeza é unha máquina en forma de caixa na que se imprimen unha pequenas pezas de plástico, pero esta tecnoloxía está evolucionando tan rapidamente que xa estamos a ver robots imprimindo estruturas de todo tipo, sen limitarse a unha caixa cadrada na que todo sucede.

MX3D_Bridge

Un exemplo de impresión de estruturas xa o vimos hai tempo no artigo “A impresora 3D capaz de imprimir edificios” no que se observa unha impresora botando chorros de formigón para “imprimir” a estrutura dun edificio.

Hoxe imos ver que tamén podemos imprimir aceiro. A empresa MX3D pretende construír unha ponte de aceiro sobre un canal de Amsterdam utilizando robots industriais e aplicando unha novidosa técnica de impresión 3D que abre paso á creación automatizada de estruturas a gran escala.

Nesta animación presentan o seu proxecto:

[youtube: MX3D Bridge Visualisation]

Nestes vídeos podemos ver algunhas das probas realizadas pola empresa para construír unha pequena ponte de aceiro de pequenas dimensións.

[youtube: MX3D printing]

[youtube: MX3D to 3D print a steel bridge in Amsterdam]

 

Máis información en MX3D

A impresora 3D capaz de imprimir edificios

Sen dúbida, é o momento das impresoras 3D, que están a revolucionar a fabricación de obxectos. As impresoras 3D son máquinas capaces de crear pezas volumétricas a partir dun deseño feito por ordenador superpoñendo capas de material.

O revolucionario do tema é que os consumidores temos a oportunidade que fabricar os nosos propios produtos, cousa que ata agora estaba reservada ás fábricas. Se dispoñemos dunha impresora destas podemos fabricar calquera pequeno obxecto de uso cotiá, máis ou menos personalizado, producir unha peza estragada que non atopamos no mercado ou deseñar e construír as formas que imaxinemos. Hai tempo falabamos aquí de como montarse unha para un centro de ensino.

Porén, cando se fala de impresión 3D non debemos pensar unicamente en pequenos obxectos de plástico. Tamén é posible imprimir edificios!

Iso é o que están a probar na University of Southern California cunha impresora 3D xigante que bota chorros de formigón seguindo un patrón deseñado por ordenador, e aseguran que pode construír unha vivenda en 24 horas. Supoño que se refiren só a estrutura, pois unha vivenda non consta unicamente de paredes e hai que contar coas instalacións eléctricas, de auga, saneamento, calefacción, etc. que levan máis tempo.

A tecnoloxía chámase Contour Crafting, e pode revolucionar a industria da construción ao permitir automatizar o proceso, abaratando custos. O robot encargaríase de construír a estrutura, deixando para os humanos o traballo fino das instalacións. Ademais, a técnica de impresión permite construír formas creativas e exóticas que polos medios tradicionais sería moi difícil facer, polo menos sen dispararse o orzamento.

Nestes vídeos podes ver como é o proceso:

[youtube: Why Design Now?: Contour Crafting]

[youtube: Animation of Contour Crafting in whole house construction (high res)]

 

Máis información: contourcrafting.org

Visto en:  innovation.uk.msn.com