tecnoloxia.org

Tecnoloxía na Educación Secundaria

X Xornadas de Tecnoloxía de Galicia

apetegaPara o profesorado de tecnoloxía:
Xa están en marcha as X Xornadas de Tecnoloxía de Galicia, que este ano vanse realizar no IES Lamas de Abade de Santiago de Compostela os días 23 e 24 de Abril de 2010.

Eu repetirei o obradoiro de robótica con Lego Mindstorms NXT “Robots en acción!” das edicións pasadas, así que se aínda non probastes e queredes fedellar cos robots de Lego vémonos alí.

Tedes toda a información e o formulario de inscrición na web de apetega.…

III Xornada Monográfica de APETEGA. Enerxía Solar.

apetega_solar.pngAPETEGA organiza un ano máis a Xornada Monográfica, esta bez baixo o tema A Enerxía Solar. Será o 28 de novembro de 2009 en Nigrán.

A xornada está dirixida ao profesorado do ensino público de educación secundaria que imparta a área de Tecnoloxía.

Os obxectivos son:

  • Presentar os principios físicos de captación e almacenamento de enerxía solar térmica e a súa aplicación ao procesado de alimentos.
  • Fomentar o desenvolvemento de prototipos de cociñas solares adaptadas a diferentes condicións e usos.
  • Presentar os materiais e dispositivos empregados na captación e utilización da enerxía solar fotovoltaica.
  • Capacitar ao profesorado na construción de reguladores de tensión electrónicos adaptados a uso solar.

Prazo de inscrición: dende o luns 9 de novembro ás 22:00 h ata o venres 20 de novembro ás 20:00 h
Hai prazas limitadas, así que se vos interesa anotádevos canto antes.

Máis información:

Manifesto en defensa da lingua galega de APETEGA

A Asociación do Profesorado de Tecnoloxía de Galicia, APETEGA, aprobou na pasada asemblea o seguinte comunicado:

Manifesto en defensa da lingua galega

Como asociación de profesorado, queremos manifestar a nosa preocupación ante a intención do novo goberno de Galicia de derrogar o Decreto 124/2007 polo que se regula o uso e promoción do galego no sistema educativo.

Consideramos que a lingua galega forma parte da riqueza e da idiosincrasia do noso país, e como todos sabemos o seu uso está en alarmante retroceso. Dende as institucións educativas debe ser transmitida e apoiada para fomentar o seu uso, buscando unha situación de igualdade real entre as dúas linguas de Galicia.

Asociación do Profesorado de Tecnoloxía de Galicia, APETEGA
Santiago de Compostela, 12 de xuño de 2009

linguassuman.jpgA título particular, considero que utilizar a lingua e a educación como arma política é un feito lamentable e completamente irresponsable. A lingua é cultura e nos centros de ensino trasmitimos ante todo cultura, e iso debe defenderse sempre, con independencia das políticas dun goberno ou dos intentos de censurar información que recordan a épocas pasadas.

O ensino debe estar guiado sempre polo rigor científico e por criterios educativos, e non por intereses políticos que desprezan a cultura e a liberdade de información e de expresión.


2009061723335052704.jpg

Tríptico da Coordinadora Galega de Equipos de Normalización e Dinamización Lingüística: “As linguas suman“…

A mostra de proxectos nos medios de comunicación

Algúns medios de comunicación fixéronse eco da V Mostra de Proxectos “Tecnoloxía na rúa” organizada por APETEGA.

No Telexornal Serán da TVG. 12/06/2009 – 21:05.
Pequenos “enxeñeiros” mostraron os seus inventos en Santiago.

Na Voz de Galicia:
Docentes de Tecnoloxía piden máis medios para poder impartir a materia no bacharelato. A exposición de traballos da praza do Toural superou as previsións e impactou

lavoz_mostra.jpgEn realidade o que se pide é que deixen impartir as materias de Tecnoloxía Industrial e Electrotecnia en Bacharelato, pois en moitos centros a inspección non as permiten ofertar, sendo materias de modalidade.

Non hai ningunha restrición á oferta de ningunha materia do Bacharelato excepto para as materias de tecnoloxía, e non poden xustificar non deixar ofertalas polos recursos que se necesitan, pois tampouco hai unha dotación axeitada para impartir a Tecnoloxía da ESO e sen embargo estase a impartir perfectamente, xa que o profesorado xa nos sabemos buscar a vida para conseguir os recursos necesarios, físicos e virtuais. Desgrazadamente é así.

Non se entende esa política antitecnolóxica da Consellería de Educación, e así nos vai neste país. Ao final o maior perxudicado é o alumnado interesado pola tecnoloxía e polos estudios superiores relacionados, ao que non se lle permite aprender.…

V Mostra de proxectos. Tecnoloxía na Rúa.

Vmostradeproxectos.pngA Asociación do Profesorado de Tecnoloxía de Galicia, APETEGA, organiza a súa quinta mostra de proxectos “Tecnoloxía na Rúa“, na que se amosarán os prototipos desenvolvidos polo alumnado de tecnoloxía de diversos institutos de Galicia.

Será o vindeiro venres 12 de xuño de 2009 de 17:00 a 19:30 na Praza do Toural, en Santiago de Compostela.

Para o profesorado de tecnoloxía:

Animádevos a asistir e levar os traballos dos vosos alumnos e alumnas. Sen a vosa colaboración a mostra non é posíbel. Tedes que inscribirvos na web de apetega e alí tedes toda a información sobre a organización do evento.

Para o alumnado de Baiona:

Levarei unha selección dos mellores proxectos que estean rematados nesa data. Se queredes asistir debedes convencer aos vosos pais e nais para que vos leven a dar unha volta por Santiago ese día.

Ademais, este xoves día 4 de xuño veñen visitarnos ao insti os nenos e nenas que cursan 6º de primaria, e no departamento de tecnoloxía queremos facer unha exposicón cos vosos traballos. A mostra será no Taller II. Tedes que poñervos as pilas e intentar deixalos funcionando para ese día.

Aquí tes uns vídeos coas mostras de proxectos de edicións anteriores:

Toda a información na web de APETEGA