tecnoloxia.org

Tecnoloxía na Educación Secundaria

Práctica do pulsador con memoria

Para 1º de Bacharelato: Vou poñer aquí unhas pistas ao exercicio que vos pedín o outro día, para quen ande perdido.

Cando prememos nun pulsador, un LED acéndese se estaba apagado e apágase se estaba aceso.fluxo_memoria1

  • Creamos unha variable “estadoLED” que almacena o estado no que se atopa o LED (aceso 1 ou apagado 0). Inicialmente poñémola a cero.
  • Utilizamos un condicional if … else … para indicar que cando o pulsador estea premido o LED deberá acenderse se o valor da variable estadoLED é 0 e deberá apagarse se o valor de estadoLED é 1. Hai que lembrarse de cambiar a variable estadoLED unha vez que o LED cambie de estado.
  • Debedes poñer un retardo (delay) ao final do bucle para evitar que detecte varios pulsos cada vez que prememos. Máis adiante xa veremos como solucionar mellor isto.

Na dereita tendes un diagrama de fluxo do proceso.

Esta é unha montaxe que podedes utilizar no simulador 123DCircuits para facer probas na casa:

123DCircuits_LED_pulsador

Xa son demasiadas pistas, así que non hai escusa para non facelo ben!…

Simulador de arduino online

Hai tempo que tiña noticias deste simulador, pero ata agora non me puxen a probalo, e a verdade é que ten moitas posibilidades.

123D Circuits permite realizar montaxes electrónicas virtuais e programar unha tarxeta arduino UNO, o cal é moi interesante para que o alumnado faga probas de programación na casa e comprobe o resultado sen necesidade de ter os compoñentes físicos. Como calquera simulador, é unha axuda que non substitúe as montaxes prácticas, que se deben realizar na clase.

Con 123D Circuits podemos tamén deseñar proxectos de maneira colaborativa entre varias persoas e compartir o resultado coa comunidade.

Ademais, a aplicación permite embeber os proxectos en calquera sitio web. Por exemplo, aquí tedes un programa para xerar diferentes cores cun LED RGB no que se pode ver a montaxe e o código arduino.

Convocatoria para un proxecto de automática/robótica con hardware e software libre

GALPon (Grupo de Amigos Linux de Pontevedra), coa intención de fomentar o coñecemento e emprego das tecnoloxías libres entre a mocidade, fai un ofrecemento moi interesante a aqueles centros de ensino e entidades adicadas á formación da provincia de Pontevedra que presenten un proxecto de automática e robótica con hardware e software libre.

GALPon subministrará o material necesario para a realización do proxecto ata un importe máximo de 1.000 €, contribuirá no asesoramento do equipo de traballo na escolla de software, poderá axudar na programación dos scripts, e concederá un premio en metálico aos membros do equipo no caso de que o proxecto acade o resultado previsto.

Non queda moito tempo para presentar un proxecto (ata o 1 de outubro), pero paga a pena intentalo, especialmente para aqueles centros que non conten con recursos para mercar hardware. É unha oportunidade para arrancar con arduino nas clases de tecnoloxía de ESO e Bacharelato, ou de montar unha impresora 3D como a que nos contaba Tucho hai pouco neste blogue.

Tes toda a información en:

Imprimir en 3D na ESO: Guía práctica

Foi nas XII Xornadas de Tecnoloxía de Galicia cando vin funcionar a impresora 3D que montou Tucho Méndez no seu centro. Pareceume un proxecto moi interesante para levar a cabo nos institutos, e propúxenlle escribir un artigo no que se indicasen os pasos para poñelo en marcha e axudar así a darlle difusión a través de tecnoloxia.org.

Quen queira introducirse este curso na aventura da impresión 3D que se poña en contacto con Tucho para montar un equipo de traballo. Os seus datos son:

 

Aquí tedes o artigo:


Imprimir en 3D na ESO: Guía práctica

5 Setembro 2013 by Tucho Méndez

Que quede isto claro: hai menos dun ano eu non sabía absolutamente nada de impresoras 3D.
Subliño: absolutamente nada.

En maio de 2013 os meus alumnos e alumnas de 4º da ESO de PDC do CPI de Atios, o equipo Imprusiño, conseguiron rematar a primeira impresora 3D escolar e Open Hardware de Galicia.

Cando o penso aínda me parece incrible que chegásemos a rematar o proxecto. Pero o incrible non somos nin o profesor nin os rapaces e rapazas que o conseguimos, senón que, grazas á excepcional comunidade que hai arredor da impresión 3D Open Hardware, é posible, para calquera que teña ganas, construír a súa impresora 3D. Até un grupo de alumnos de PDC dun colexio dun recuncho de Galicia cun profesor escasamente preparado.

Antes de nada, se cadra está ben contestar a un par de preguntas:

Que é unha impresora 3D?

Supoño que, a estas alturas, xa sabes un pouco de que van, mesmo viches algunha en directo, así que non me estendo: son máquinas que fan cousas a partir dun deseño que tes na computadora. Cousas tanxíbeis, reais… obxectos!

[youtube:Imprusiño imprimindo]

Que é Open Hardware?

A filosofía de coñecemento aberto, aplicada ao hardware. Grazas a que existe e ten unha comunidade detrás que a fai real, agora podemos facer a nosa impresora 3D por menos diñeiro do que costa un iPad.

E agora, a listaxe de pasos para construír a túa impresora 3D Open Hardware:

1 – Vai á wiki de Clone Wars, está un pouco desordenada nalgúns aspectos, pero que non te bote para atrás. Comeza por ler as FAQ’s e segue as ligazóns que aparecen. En realidade, se cumpres con este punto, non fai falta que sigas a ler, a túa impresora estará acabada antes do que pensas.

2 – Se aínda segues aquí, adiántoche unha referencia á que xa ías chegar, porque non creo que haxa unha soa impresora Open Hardware montada no Estado Español que non lle deba nada a esta colección de 63 videotitoriais que describen o proceso de montaxe dunha Prusa 2 (Mil grazas a @Obijuan_cube por todo).

Ollo! non son as instrucións dun moble de IKEA, non esperes que, seguindo todo paso por paso, non te atoparás con ningún problema, porque iso non vai pasar.

3 – Agora que conseguín que pensaras nos problemas, respira. Hai xente que che pode botar unha man con eles. Apúntate na lista de correo de Clone Wars. É a chave de todo, así que cóidaa. Aquí hai persoas que van perder o seu tempo en axudarte a arranxar os teus problemas e non cobran por iso, o único que esperan a cambio é que, antes de nada, leas moi ben isto e, xa que estás, tamén isto.

4 – Consegue as pezas. Vas precisar cartos. Nós conseguimos algúns cun pouco de crowdfunding caseiro e o resto púxoo o centro. Pode que teñas pouco diñeiro no departamento e que quen mande nos cartos do teu centro non vexa que, con menos do que custa un portátil, podedes ter facer unha máquina marabillosa. Se é así, remexe en todos os sofás do teu centro, tes que conseguir o suficiente para facelo!

5 – Ponte mans á masa! E que saibas que xa hai algún proxecto en marcha para o curso que ven e, se somos uns poucos, podemos crear unha pequena comunidade, axudarnos, intercambiar experiencias…  Así que, se queres, ponte en contacto comigo. A mellor maneira de atoparme é en twitter, son @procastino,  ou non dubides en mandarme un correo a tuchodefresa en gmail.

Nada máis, agora todo o que precisas son ganas. Espero que este artigo servira para que te animes a comezar. Se o fas, estarás a iniciar un precioso camiño de aprendizaxe en comunidade. Que a Prusa te acompañe!

Tucho Méndez, profesor de tecnoloxía do CPI Alcalde Xosé Pichel de Coristanco.

OpenPipe, a gaita electrónica

As persoas aficionadas á gaita e á electrónica xa teñen un novo xoguete: OpenPipe.

Trátase dun proxecto de gaita electrónica MIDI desenvolvido por @Xulio Coira. Utiliza un tubo de PVC cuns sensores capacitivos que detectan a posición dos dedos. Estes sinais envíanse a unha tarxeta controladora arduino, que utiliza a saída PWM para a xeración de son.

Aquí tes o resultado:

[youtube: OpenPipe meets eChanter]

A cousa mellora cando engadimos unha tarxeta MIDI, pois dese xeito podemos cambiar o instrumento que desexamos que soe.

[youtube: OpenPipe breakout board & Arduino Musical Shield]

Para saber máis sobre este proxecto visita a web de OpenPipe. Alí tes a información sobre os compoñentes utilizados e podes descargar o código fonte utilizado na programación.

Se che interesa como foi levado a cabo este proxecto, podes ver a presentación do mesmo na Castelao Barcamp Vigo 2012