tecnoloxia.org

Tecnoloxía na Educación Secundaria

Tucomics. Titoriais de electrónica en banda deseñada

O formato de banda deseñada é moi interesante para comunicar calquera contido de forma fácil. Ben o saben Aitor Aloa e Ibon Sánchez, que están a buscar financiamento e colaboración para poder levar a cabo o seu proxecto: Tucomics.

Necesitan entre 4000 e 8000 € para realizar un primeiro traballo consistente en dez titoriais sobre electrónica, hardware libre e fabricación propia en formato de banda deseñada. Por exemplo, explicarannos que é o hardware libre, o código das resistencias, os símbolos electrónicos, como soldar con estaño, como utilizar un multímetro ou unha breadboard, etc.

O cómic resultante estará a disposición online, en formato web e pdf, baixo licenza Creative Commons, para poder reproducilos, modificalos, traducilos, distribuílos, etc. Eu xa me ofrecin para traducir ao galego.

Quédalles moi pouquiño para chegar ao mínimo e acábaselles o tempo! Se che interesa o traballo podes colaborar no proxecto a través de goteo.org

Hai outros exemplos de electrónica en banda deseñada:

III Día da Ciencia e da Tecnoloxía en galego

Pensaba que esta convocatoria sería para un día concreto en novembro coma nos anos anteriores, pero parece ser que o III Día da Ciencia e da Tecnoloxía en Galego celébrase este ano desde o 16 de outubro ata o 5 de novembro. Este evento está organizado polas asociacións IGACIENCIA, AGAPEMA, ENCIGA e APETEGA, e ten coma principal obxectivo defender a idoneidade do uso do galego nas áreas de ciencias e de tecnoloxía.

Desde a organización propóñense varias actividades, entre elas:

Tecnopoly

Ideado por profesorado de APETEGA, consiste nun xogo similar ao Monopoly, pero as rúas substitúense por inventos das diferentes épocas da historia da humanidade: parafuso de Arquímedes, arcos, imprenta, máquina de vapor, transistor, robots, … onde os xogadores comprarían as patentes ou dereitos de explotación. As casiñas de sorte e similares substitúense por preguntas tipo trivial que dan cartos ou posibilidade de volver tirar.

Tanto o taboleiro como os cartos e títulos de propiedade están dispoñibles para a súa descarga nun formato imprimible:

Ponte e cúpula desmontables de Leonardo:

Podemos construír no taller unha ponte deseñada por Leonardo Da Vinci que non necesita cravos nin cordas para unir as madeiras. Neste documento tedes as instrucións. Veredes que fácil!

No IES A Sangriña de A Guarda vai construíla o alumnado de 2º de ESO. O profesor, Antonio Lomba, busca financiación para poder construír unha ponte de grandes dimensións (2 ou 3 m de largo), así que se alguén se anima a axudar, que se poña en contacto con el.

Outro traballo interesante é a construción dunha cúpula baseada nun patrón iniciado por Leonardo Da Vinci. Neste documento tedes as instrucións.

Vídeoconferencia do CERN

A Coordinadora Galega de Equipos de Normalización e Dinamización Lingüística propón de novo unha interesante actividade. Reunirán nunha videoconferencia a varios investigadores e investigadoras que participan nos experimentos do LHC e que nos contarán a súa experiencia científica e lingüística e as vantaxes que lles supuxo saber falar galego.

Será o martes 6 de novembro entre as 12:30h e as 13:30h e está destinado ao alumnado do segundo ciclo de ESO e Bacharelato. Tedes aquí máis información.

Como material complementario para os máis cativos temos “Alicia e a sopa de quarks e gluóns“, banda deseñada creada dende o CERN na que se explica dun xeito didáctico cales son as partículas elementais e como se experimenta con elas no proxecto ALICE. Descargar pdf.

Revoltallo de termos

Foi unha actividade promovida por este blogue para o evento de hai dous anos, pero segue aberta a todas aquelas persoas que queiran utilizala. Consistiu en enviar a través dun formulario un termo en galego do mundo da tecnoloxía, e logo realizar cos termos recollidos unha serie de actividades: encher as paredes con eles, participar na galipedia, etc.

Tedes toda a información na sección “Revoltallo de Termos“.

Cando?

Non é estritamente necesario que estas actividades se fagan estes días, agás o da conferencia, claro. A ciencia e a tecnoloxía poden ser en galego todos os días do ano!

Yes is More. Arquitectura en banda deseñada.

Banda deseñada: Yes Is More. Un arquicómic sobre a evolución arquitectónica. Editorial Taschen. En castelán.

O grupo BIG (Bjarke Ingels Group), formado por arquitectos, deseñadores e creativos daneses presenta os seus proxectos urbanos e arquitectónicos a modo de manifesto gráfico utilizando o formato banda deseñada, distribuído tamén coma aplicación do IPad.

Dita opción converte un catálogo estendido de proxectos nunha obra de divulgación e aproximación aos métodos, medios e procesos dun estudo arquitectónico, ilustrando no mundo real o desenvolvemento dun proxecto tecnolóxico, dende o deseño ata a construción ou o rexeitamento da idea proposta.

O medio de comunicación escollido, a banda deseñada, vai en consonancia coas propostas arquitectónicas do grupo BIG: populares, modernas e innovadoras, como é o caso dos proxectos Lego Towers ou The 8-House.

[8H – The 8-House from BIG on Vimeo.]

En calquera caso estamos ante unha obra que pode espertar o interese no urbanismo e na arquitectura, ao velos como temas abertos e dinámicos, tan problemáticos coma apaixonantes.


(Clica na imaxe para ampliar. Edición en Inglés)

 

Posible uso do libro na área de Tecnoloxía: O uso pode ser dobre, coma forma e como contido.

En canto a forma, basta con ler un capítulo para decatarse da potencia da banda deseñada como medio de comunicación. Neste senso hai que avisar de que a calidade gráfico-narrativa da obra é modesta, non é de interese para aficionados ao cómic coma medio artístico, pero si para os interesados no cómic coma medio de comunicación. Aínda así, pode servir como exemplo para que o alumnado faga un traballo similar utilizando fotografías e programas de edición, como estes cómics sobre o Proxecto Bata (proxecto interdisciplinar de igualdade de xénero) ou este sobre como cambiar a fonte de alimentación do ordenador.

En canto ao contido pode ser un libro de interese para as áreas de Tecnoloxía, Plástica e Ciencias Sociais, ou para calquera traballo interdisciplinario sobre arquitectura, urbanismo ou a ordenación do territorio.

Moitos institutos e colexios levan anos participando no Proxecto Terra, magnífico traballo creado por Xosé Manuel Rosales e financiado polo Colexio de Arquitectos. No material do proxecto hai un cómic sobre arquitectura, A mansión dos Pampín, de Miguelanxo Prado, o mellor autor de banda deseñada galega. Non é precisamente o seu mellor cómic, pero cumpre a súa función. O cómic atópase en todos os centros e pode lerse en liña aquí.

 

Por outra banda, a quen lle interese o tema da arquitectura e a banda deseñada pode botarlle unha ollada a Arquicómics.…

O camiño da innovación

É algo que xa comentei de forma sutil algunha vez neste blogue, como neste post, ou neste: a innovación non é doada, por moitas razóns, é un dos aspectos que se teñen que ter en conta no proceso tecnolóxico é aceptación do produto por parte da sociedade.

Inventos revolucionarios ao longo da historia que fixeron e fan un gran servizo á sociedade atópanse con moitas barreiras que teñen que superar. Unha delas é a conservación de usos, leis, profesións e estruturas antigas que necesariamente téñense que adaptar á nova situación.

Néstor Alonso ilústrao moi ben en Educ@conTIC
guenberg520_gal

Para reflexionar:
Cambia a imprenta por internet. Estamos ante algo que revolucionou a difusión da cultura e das ideas.

Pensa agora nas formas clásicas de difusión do coñecemento a través de libros de texto, revistas en papel, música, cine, xornais, … Internet débese adaptar á industria que os sustenta? ou dita industria debe adaptarse ás novas formas de comunicación que nos ofrece a rede? Como tería que ser esa adaptación? Como ves o futuro dos medios?

En 1º de bacharelato podemos falar sobre estas cousas, entre moitas outras, claro.…

Animación por ordenador

Desde que xorde a idea de crear unha película ata que está en carteleira, hai un longo período de tempo no que traballan un extenso equipo de profesionais. Tamén son moitas horas de traballo as necesarias para crear un xogo de ordenador.

animacion.JPGEntre as tarefas que hai que realizar está a animación 3D, que permite modelar e animar en tres dimensións.

Se observas ben poderás ver que temos 4 vistas, alzado, planta, perfil, e vista de cámara, e baseándose nestas vistas, os modelos xéranse mediante ferramentas de software.

Neste vídeo podes ver como se modela un dragón.

Despois aos modelos ténselles que incluír un “esqueleto” coas mesmas limitacións e capacidades que ten un esqueleto humano. Dese xeito obtéñense movementos naturais.

Botádelle unha ollada aos curtos de animación do audiovisual galego: Flocos.tv

Nós tamén podemos facer películas de animación mediante aplicacións que nos facilitan a tarefa, sen ter que debuxar. Podes ver aquí uns exemplos:

XtraNormal: Permítenos crear películas de animación e engadir voz ás personaxes.


[Xtranormal: Van vir molestar]

Deixarás que se escapen? Vai por eles e continúa a película.

Tamén podemos facer animacións en 2D cunhas aplicacións en flash coma estas:

GoAnimate! Elixe as personaxes, escribe o texto que queres que apareza, elixe a música de fondo, e xa tes a túa animación.


[Goanimate: Aburridos]

A ver se o robot e o marciano deixan de aburrirse. Anímaos!

MovieMaker: Esta aplicación é similar á anterior, anque máis sinxela.


Aceptades a súa invitación?

Outros máis

domo.goanimate.com
es.goanimate.com