tecnoloxia.org

Tecnoloxía na Educación Secundaria

RoboCup 2014

Xa rematou o mundial de fútbol, pero no mesmo Brasil comeza o 19 deste mes outro torneo máis importante desde o punto de vista tecnolóxico: RoboCup 2014.

A RoboCup foi fundada en 1997 co principal obxectivo de “desenvolver ata 2050 un equipo de Fútbol de Robots capaz de gañar ao equipo humano campión do Mundial da FIFA“.

Desde logo que o reto é ambicioso, pero non pensedes que a única motivación é gañar un simple partido entre robots e humanos, por complicado que sexa, senón que detrás de todo isto está o interese por estimular a investigación e o desenvolvemento dunha ampla gama de tecnoloxías que permitan aos robots actuar de forma autónoma e coordinada: Integración entre electrónica, mecánica e informática, intelixencia artificial, aprendizaxe e toma de decisións, desenvolvemento de sensores, procesamento de imaxe en tempo real, recoñecemento de patróns, coordinación e comunicación entre robots, etc.

A RoboCup hoxe en día abrangue outras ligas amais da do fútbol: A RoboCup Rescue promove o desenvolvemento de robots capaces de intervir en situacións de desastre ou nun ambiente hostil, na RoboCup Home os robots deben saber desenvolverse en escenarios realistas e cotiáns, como o ámbito doméstico, a RoboCup Work promove a investigación e desenvolvemento de robots para aplicacións industriais, a RoboCup Logistics ten coma obxectivo desenvolver sistemas de robots auto-organizados que sexan capaces de resolver problemas de procesamento, transporte e distribución de pedidos, e non pode faltar a RoboCup Junior, unha iniciativa cuxa finalidade é achegar a robótica a estudantes de educación primaria e secundaria.

Nestes vídeos podedes ver en que consiste a competición:

Vídeo promocional RoboCup Brazil:
[youtube:RoboCup Overview]

Vídeo promocional da anterior edición de 2013:
[youtube:RoboCup 2013 Trailer ]

Este cóntanos a historia das competicións de fútbol entre 1997 e 2011
[youtube:RoboCup Robot Soccer History 1997 — 2011]

Danza contemporánea con robots de Blanca Li

Non é a primeira vez que vemos robots actuando en espectáculos de danza e teatro, e tampouco será a última. A comunicación humano-máquina é un tema que dá para moito, e parece que a coreógrafa Blanca Li sabe aproveitalo ben introducindo instrumentos musicais robóticos de Maywa Denki e varios robots NAO de Aldebaran Robotics no seu espectáculo de danza contemporánea.

Encantaríame velo!

[Robot! (extraits) Compagnie Blanca Li from Blanca Li on Vimeo]

Visto no telexornal da TVE:
[TVE: La coreógrafa Blanca Li crea una orquesta donde los músicos son máquinas y los bailarines robots]

Smart Trashbox: A papeleira intelixente

Xa temos a solución á falta de limpeza nos colexios e institutos, cuxos chans vemos sempre ateigados de papeis engurrados e de envoltorios de larpeiradas: Smart Trashbox, unha papeleira que persegue os obxectos que se dirixen cara ela, facendo que os tiros sempre atinen no seu interior.

A papeleira utiliza kinect para realizar un escaneo da habitación. Cando detecta un obxecto en movemento no aire, calcula a súa posición, velocidade e punto de caída aproximado, e comunica estes datos á papeleira, que se moverá cara ás coordenadas calculadas para intentar atrapalo.

No seguinte vídeo tes o anuncio no que se inspirou o autor, o proceso de deseño e fabricación, e verás a papeleira en acción a partir do minuto 2:25.

[youtube: Smart Trashbox] (Visto en: kirainet.com)

O malo de implantar un sistema así nas aulas dos institutos é que non contribuiría a educar ao alumnado.

Temos outro modelo de papeleira robotizada, pero neste caso non se encarga de recoller o lixo, senón en pedirnos educadamente que o recollamos. Cando a papeleira-robot, despois de pasearse dun lado a outro da habitación, atopa algo de lixo, o que fai é dirixirse cara os humanos e inclinar o corpo ante eles pedindo axuda para recoller os desperdicios.

A papeleira en cuestión chámase Sociable Trash Box, e representa un novo concepto de robótica: Os robots non se deseñan para axudar aos humanos, senón que son os robots os que necesitan a axuda das persoas para lograr o seu cometido. Aquí o importante é a capacidade dos robots de comunicarse coas persoas, a súa sociabilidade.

[youtube: Sociable Trash Box] (Visto en: nippon.com)

De tódolos xeitos, como non dispoñemos destes robots, non queda outra que tirar os papeis ás papeleiras intentando ter boa puntería, e recolléndoos cando non fagamos canasta.…

A impresora 3D capaz de imprimir edificios

Sen dúbida, é o momento das impresoras 3D, que están a revolucionar a fabricación de obxectos. As impresoras 3D son máquinas capaces de crear pezas volumétricas a partir dun deseño feito por ordenador superpoñendo capas de material.

O revolucionario do tema é que os consumidores temos a oportunidade que fabricar os nosos propios produtos, cousa que ata agora estaba reservada ás fábricas. Se dispoñemos dunha impresora destas podemos fabricar calquera pequeno obxecto de uso cotiá, máis ou menos personalizado, producir unha peza estragada que non atopamos no mercado ou deseñar e construír as formas que imaxinemos. Hai tempo falabamos aquí de como montarse unha para un centro de ensino.

Porén, cando se fala de impresión 3D non debemos pensar unicamente en pequenos obxectos de plástico. Tamén é posible imprimir edificios!

Iso é o que están a probar na University of Southern California cunha impresora 3D xigante que bota chorros de formigón seguindo un patrón deseñado por ordenador, e aseguran que pode construír unha vivenda en 24 horas. Supoño que se refiren só a estrutura, pois unha vivenda non consta unicamente de paredes e hai que contar coas instalacións eléctricas, de auga, saneamento, calefacción, etc. que levan máis tempo.

A tecnoloxía chámase Contour Crafting, e pode revolucionar a industria da construción ao permitir automatizar o proceso, abaratando custos. O robot encargaríase de construír a estrutura, deixando para os humanos o traballo fino das instalacións. Ademais, a técnica de impresión permite construír formas creativas e exóticas que polos medios tradicionais sería moi difícil facer, polo menos sen dispararse o orzamento.

Nestes vídeos podes ver como é o proceso:

[youtube: Why Design Now?: Contour Crafting]

[youtube: Animation of Contour Crafting in whole house construction (high res)]

 

Máis información: contourcrafting.org

Visto en:  innovation.uk.msn.com

Non son simples camións, son robots.

Na mina de cobre Gabriela Mistral, en Chile, traballan 17 camións volquete para transportar o mineral do xacemento. Ata aquí todo normal, como en calquera mina. A peculiaridade é que estes camións traballan de forma completamente autónoma. Son camións-robot programados para executar tarefas e percorrer rutas predeterminadas e precisas, e posúen sensores para responder ante imprevistos, por exemplo, cando se atopan un obstáculo ou persoa no seu percorrido.

Os camións son modelo Komatsu 930E4, teñen unha capacidade de 290 toneladas métricas e unha potencia de 2.700 cabalos de vapor. Neste vídeo podes ver como funcionan:

[youtube: Imágenes camiones autónomos, Minera Gaby]
(Visto en fayerwayer)