tecnoloxia.org

Tecnoloxía na Educación Secundaria

Twitter en galego

Tuiteiras e tuiteiros, despois de dar moita caña a través dos hashtags #twitterengalego e #twitterengalegoxa e, sobre todo, grazas ao traballo voluntario de tradutores e tradutoras, por fin podemos configurar a rede social Twitter no idioma galego.

De momento aínda é unha versión Beta, polo que se supón que a tradución está aberta a correccións e modificacións.

A min, despois de case 5 anos tuiteando, cústame admitir chamarlle chío a un tuit. Non creo que fose necesario traducir unha palabra tan estendida e usada nesta rede, pois iso tal vez provoque máis rexeitamento que aceptación. Non sei. A min persoalmente non me gusta :-(

En fin, parabéns á comunidade tuiteira galega. De tódolos xeitos, non chega con configurar Twitter en galego, hai que tuitear en galego!…

O notificador: comunicación social en 1935

Hoxe en día utilizamos medios de comunicación sociais para deixar mensaxes aos nosos amigos e amigas. Se deixas a mensaxe “Voume de vacacións a Carnota!” en tuenti , no fotolog ou en twitter, os teus contactos decataranse de que marchaches de viaxe un tempo, sen ter que avisalos un por un mediante SMS.

Pois isto que estamos utilizando non é algo novo. Cambiaron os medios, agora electrónicos, pero a idea de deixar mensaxes en público de xeito que calquera persoa as poida ver xa existía en 1935. (Vía:lo que sea .0)

1935twitter.jpg

O que ves na imaxe chamábase “O notificador“, unha máquina instalada nas rúas, tendas e estacións de Londres a principios do século pasado que servía para que as persoas puidesen deixar mensaxes en público. Só había que escribir unha mensaxe nunha tira de papel continuo e introducir unha moeda para que a nota permanecese detrás dun cristal da máquina durante un mínimo de dúas horas.

Hoxe en día utilizamos redes sociais en Internet, que son dun gran potencial comunicativo e formativo, pero pensa que nas redes sociais abertas ao público calquera persoa pode ler as túas mensaxes e ver as fotos e vídeos que publicas.

Debes deixar para o ámbito privado aquelas mensaxes e fotos persoais que non desexes compartir con calquera. Se non as publicarías nunca na máquina “Notificador” ou no taboleiro de anuncios do insti, tampouco o fagas en Internet, pois vén sendo o mesmo, anque con outras tecnoloxías que lle dan soporte.…

Como facer que unha planta postee en Twitter

Cando temos plantas variadas nas nosas casas observamos como unhas requiren máis auga ca outras, e resulta complicado atinar coa cantidade xusta, polo menos cando a planta é nova e non a coñecemos. E se andamos coa cabeza noutro lado podemos esquecernos de regalas durante demasiado tempo.

Una solución é que sexan as propias plantas as que nos avisen cando necesitan auga, e pódeno facer chamándonos por teléfono ou escribindo un post en twitter, facendo que tamén as plantas se integren a esta rede social.

Membros do programa de Telecomunicacións Interactivas da Universidade de New York atoparon a maneira de facelo utilizando un sensor de humidade e unha controladora arduino.

Podes ver as instruccións en Botanicalls (www.botanicalls.com)

botanicalls.jpg

(fonte: www.alambre.info)

E, se queres, tamén podes seguir a “Pothos” en twitter

Twitter: Xeo en marte!

Are you ready to celebrate? Well, get ready: We have ICE!!!!! Yes, ICE, *WATER ICE* on Mars! w00t!!! Best day ever!!
(Fonte: Twitter. MarsPhoenix)

Ou sexa, que parece ser que hai auga en Marte.

Phoenix Mars Lander atópase actualmente explorando a superficie polar de marte. Podes ver nesta imaxe os instumentos que leva a bordo para levar a cabo a súa misión:

Phoenix Mars Lander

A nova sairá en tódolos medios de comunicación, así que en internet atoparedes máis información, por exemplo na web da NASA.

O motivo deste post é o meu último descubrimento: Twitter.

Twitter é unha ferramenta que mestura os conceptos de blog, rede social e mensaxería instantánea. É coma un “microblog”, que permite aos usuarios e usuarias a publicación de mensaxes curtas (máximo 140 caracteres), de xeito rápido e sinxelo, e que chegue a tódolos teus contactos.

Teño que recoñecer que me parecía algo bastante absurdo, pois non entendía moi ben a súa utilidade. Sen embargo permite o seguemento de novas dun evento de interese coma, por exemplo, a misión de Phoenix, un congreso, un festival, ou simplemente saber o que está a facer un colega.

twitter

Tedes máis información no blog “El camarote” e tamén na comunidade de profes “edutuiter“, onde se lle da un uso educativo.

A miña conta: http://twitter.com/tecnoloxia