Expresión e comunicación gráfica
Ao profesorado que anda a buscar exercicios para facer vistas pode serlle útil este xerador de exercicios de educacionplastica.net
O primeiro que hai que facer é crear a figura engadindo cubos sen superar o límite de 4x4x4. Unha vez creada a figura, a aplicación dáche a ligazón a unha páxina na que se poderán debuxar as vistas da peza creada. O resultado pode descargarse en formato png ou envialo por correo electrónico.
Grazas a Fernando Ortiz por compartir este recurso
A perspectiva isométrica é unha técnica de representación gráfica dun obxecto tridimensional en dúas dimensións, onde o tres eixos coordenados forman ángulos iguais de 120º cada un sobre o plano. É moi utilizada en tecnoloxía para o deseño e visualización de obxectos e pezas.
Aínda que vos pareza algo novo, estades moi acostumados a ver obxectos representados neste tipo de perspectiva, xa que é utilizada en moitos xogos.
Seguro que moitas e moitos de vós pasastes algún tempo na rede social Habbo, plantando verduras en Farmville, construíndo unha cidade en Cityville, interaccionando nas primeiras versións dos Sims, e moitos máis . Fixádevos ben: están debuxados en perspectiva isométrica.
En moitos destes xogos podemos orientar obxectos nun terreo isométrico coma nesta aplicación flash (vista aquí). Probade engadir unha cadeira e xirala nesta retícula en isométrica.
Para que vos entreteñades un pouco debuxando en perspectiva isométrica tedes estas aplicacións:
Tamén podedes probar estes xogos isométricos:
Cada vez somos máis os profesores e profesoras de calquera materia que gravamos e editamos vídeos ou pedímoslle ao alumnado que os faga. Porén, a maioría carecemos da formación audiovisual necesaria para realizar os nosos traballos cun mínimo de calidade.
Guión, storyboard, planos, secuencias, … Recomendades algún material de consulta que nos axude a poñernos ao día para traballar o vídeo cun pouquiño de xeito?
Eu desde logo que non me sinto capaz de abordar este tema con profundidade, e recoñezo as miñas carencias formativas neste campo, pero hoxe vou dedicar esta entrada a uns planos básicos utilizados no cine. Son unhas boísimas composicións feitas por kogonada para vimeo que atopei onte por casualidade e que creo que serven de exemplo para introducir tres tipos de planos que se poden utilizar nunha gravación.
Punto de fuga central nas películas de Kubrick:
O punto de fuga central non só dá sensación de perspectiva á imaxe, senón que tamén contribúe a que a mirada do espectador quede atrapada na fotografía, aumentando o protagonismo da imaxe.
[Kubrick // One-Point Perspective from kogonada on Vimeo.]
Contrapicados de Tarantino:
Nun plano contrapicado a cámara sitúase por debaixo do obxecto e oriéntase cara arriba. Serve para magnificar un obxecto ou persoa, por iso é tan utilizado polos políticos, ou polo mesmo Darth Vader.
[Tarantino // From Below from kogonada on Vimeo.]
Picados de Wes Anderson:
Nos planos picados a cámara grava dende arriba e oriéntase cara ó chan. O efecto que produce é o contrario có do contrapicado, pois utilízase para resaltar a fraxilidade ou inocencia do obxecto enfocado.
[Wes Anderson // From Above from kogonada on Vimeo.]
Gustaríame que alguén comparta algún material para saber máis destas cousas, e que nos axude a mellorar os nosos vídeos caseiros. Algunha recomendación?
Hoxe pola mañá estiven a seguir por streaming a Xornada Aumentame 2012, da asociación Espiral, que pretende converterse nun punto de encontro para o intercambio de ideas, experiencias, proxectos e novidades sobre a Realidade Aumentada en Educación.
Entre os relatorios da xornada é de destacar o traballo do alumno de 2º de bacharelato Víctor Valbuena do IES Vilatzara de Vilassar de Mar (Maresme), cuxo obxectivo final é conseguir unha agrupación de exercicios de axonometría acompañados das súas respectivas representacións tridimensionais en realidade aumentada para que a súa percepción espacial sexa sinxela.
Para probar a aplicación só necesitas entrar na páxina A-RA! Axonometría, imprimir o marcador, conectar a cámara web dirixíndoa cara ó marcador impreso e navegar polas distintas seccións para ver as figuras en 3D.
Máis información:
Un diagrama de Venn para definir a enxeñaría de xeito moi simplificado:
(Vía: Un tuit de @ingenieriared)
