Tomarémonos un descanso…
Volverei!
Deseño
Non todo está inventado…
Tubocadeiras
Gústanme estas cadeiras feitas con tubos e cóbados de PVC utilizados en fontanería.
(Ver en slidemypics)
A primeira é idea do deseñador Driss Zeiker, e as mecedoras son obra do grupo de deseño Joon & Jung, que non destacan unicamente polo material utilizado, senón porque co movemento producen un son similar ao do mar.
(Visto en designboom)
Historia e evolución do monopatín
Es aficionado ou aficionada ao Skateboard?
Se é así, bótalle unha ollada á sua historia e comproba a evolución do seu deseño.
Aquí tes unha infografía cos aspectos máis significativos do seu deseño:
E aquí hai información máis completa sobre a súa historia:
Lámpada con tubos e billas
Os períodos de vacacións son un bo momento para cacharrear, e se podemos aproveitar o material de refugallo para facer cousas novas mellor que mellor.
Hoxe atopei en technabob.com un deseño que me gusta: lámpadas fabricadas con tubos e pezas de billas. Acéndense e apáganse, como non podería ser doutro xeito, mediante unha chave de paso.
Aquí tes unhas fotos:
(Ver en slideMyPics)
A ver se atopo material para facerme unha lámpada destas.
Algunha idea máis para fabricarse unha lámpada de escritorio?
Repair Manifesto
Sempre andamos a dicir que as cousas, antes de tiralas, debemos pensar en ver a posibilidade de reciclalas, pois pódennos valer para algo.
Ben, pois hoxe atopeime cun manifesto que clama “Stop Recycling. Start Repairing“, é dicir, deixa a reciclaxe e comeza a reparar.
Pertence ao colectivo Platform21, fundación creada en 2006 por ING Real Estate, o consello da cidade de Amsterdam e Premsela, plataforma holandesa para o deseño e a moda.
Creo que non se deben pelexar a reparación e a reciclaxe, e non todo o mundo ten a capacidade de reparar calquera cousa, pero o manifesto paréceme moi interesante. Vén dicir isto:
– – – –
1. Faga que os seus produtos duren máis tempo! Vamos, que non tiremos as cousas innecesariamente cando poden ter unha segunda vida.
2. As cousas deben estar deseñadas de maneira que poidan ser reparadas.
– Ãs persoas deseñadoras de produtos: Facer os produtos reparables e facilitar información sobre posibles reparacións.
– Ãs persoas consumidoras: Comprar cousas que poidamos reparar, ou ben pescudar a razón pola que non existen. Ser críticas e curiosas.
3. A reparación non é a substitución. (Máis ben dependerá da peza que se estrague)
4. O que non mata engorda. Cada vez que reparamos algo, aumentamos o seu potencial, a súa historia, a súa alma e a súa beleza intrínseca.
5. A reparación é un desafío creativo.
6. A reparación sobrevive á moda.
7. Reparar é descubrir. Cando reparamos aprendemos cousas asombrosas sobre o funcionamento dos obxectos.
8. Reparación, ata nos bos tempos! Non se trata de aforrar en tempos de crise, senón que é unha mentalidade.
9. Os obxectos reparados son únicos.
10. Non sexamos persoas escravas da tecnoloxía, dominémola. Se rompeu, arránxao e faino mellor.
11. Podemos reparar calquera cousa, ata unha bolsa de plástico.
Non recicles, repara!
– – – –
O produto estrela deste colectivo é a cinta adhesiva. Non podía ser outro.
A min o punto que máis me gusta é do 2. Hoxe en día os produtos están deseñados para usar e tirar, desapareceron os parafusos que nos permiten abrilos e remexer por dentro, e se queres abrilos na maioría das ocasións non queda outra que romper a carcasa, que vén pegada. Son malos tempos para a reparación, e xorde a necesidade dun manifesto coma este.
