tecnoloxia.org

Tecnoloxía na Educación Secundaria

Lámpada con tubos e billas

Os períodos de vacacións son un bo momento para cacharrear, e se podemos aproveitar o material de refugallo para facer cousas novas mellor que mellor.

Hoxe atopei en technabob.com un deseño que me gusta: lámpadas fabricadas con tubos e pezas de billas. Acéndense e apáganse, como non podería ser doutro xeito, mediante unha chave de paso.

Aquí tes unhas fotos:
(Ver en slideMyPics)

A ver se atopo material para facerme unha lámpada destas.
Algunha idea máis para fabricarse unha lámpada de escritorio? …

Repair Manifesto

repairmanifesto.pngSempre andamos a dicir que as cousas, antes de tiralas, debemos pensar en ver a posibilidade de reciclalas, pois pódennos valer para algo.

Ben, pois hoxe atopeime cun manifesto que clama “Stop Recycling. Start Repairing“, é dicir, deixa a reciclaxe e comeza a reparar.

Pertence ao colectivo Platform21, fundación creada en 2006 por ING Real Estate, o consello da cidade de Amsterdam e Premsela, plataforma holandesa para o deseño e a moda.

Creo que non se deben pelexar a reparación e a reciclaxe, e non todo o mundo ten a capacidade de reparar calquera cousa, pero o manifesto paréceme moi interesante. Vén dicir isto:

– – – –

1. Faga que os seus produtos duren máis tempo! Vamos, que non tiremos as cousas innecesariamente cando poden ter unha segunda vida.

2. As cousas deben estar deseñadas de maneira que poidan ser reparadas.
– Ás persoas deseñadoras de produtos: Facer os produtos reparables e facilitar información sobre posibles reparacións.
– Ás persoas consumidoras: Comprar cousas que poidamos reparar, ou ben pescudar a razón pola que non existen. Ser críticas e curiosas.

3. A reparación non é a substitución. (Máis ben dependerá da peza que se estrague)

4. O que non mata engorda. Cada vez que reparamos algo, aumentamos o seu potencial, a súa historia, a súa alma e a súa beleza intrínseca.

5. A reparación é un desafío creativo.

6. A reparación sobrevive á moda.

7. Reparar é descubrir. Cando reparamos aprendemos cousas asombrosas sobre o funcionamento dos obxectos.

8. Reparación, ata nos bos tempos! Non se trata de aforrar en tempos de crise, senón que é unha mentalidade.

9. Os obxectos reparados son únicos.

10. Non sexamos persoas escravas da tecnoloxía, dominémola. Se rompeu, arránxao e faino mellor.

11. Podemos reparar calquera cousa, ata unha bolsa de plástico.

Non recicles, repara!

– – – –

O produto estrela deste colectivo é a cinta adhesiva. Non podía ser outro.
cinta.png

A min o punto que máis me gusta é do 2. Hoxe en día os produtos están deseñados para usar e tirar, desapareceron os parafusos que nos permiten abrilos e remexer por dentro, e se queres abrilos na maioría das ocasións non queda outra que romper a carcasa, que vén pegada. Son malos tempos para a reparación, e xorde a necesidade dun manifesto coma este.…

Deseño industrial

desenho_industrial2.jpgSegundo a wikipedia, denomínase deseño industrial á actividade humana ligada á creación, desenvolvemento e humanización dos produtos industriais, que busca resolver as relacións formais-funcionais dos obxectos susceptibles de ser producidos industrialmente, mediante unha expresión creativa e progresista que considera a función, estética e os materiais.

Calquera obxecto que teñas no teu entorno, dende o máis simple ata o máis complexo, foi deseñado por un equipo de persoas que tiveron en conta a súa funcionalidade, estética, ergonomía, estudos de mercado, culturais, etc. En moitas ocasións cómpre o traballo conxunto entre distintas especialidades da enxeñería (deseño, electricidade, electrónica, materiais, mecánica, sistemas, industrial, …) para que unha idea se faga realidade e se transforme nun produto no mercado.

desenho_industrial4.jpgEn relación a isto, até o 3 maio está na Fundación Pedro Barrié de la Maza, en Vigo, a exposición “Deseño Holandés. Na rúa como na casa“, unha ampla mostra do deseño holandés máis contemporáneo e innovador.

A interacción das persoas cos obxectos, a procura de solucións eficaces a problemas de tódolos días, a necesidade de atopar materiais que non sexan agresivos para o medio ambiente, a utilización de referencias á natureza no mobiliario particular e a relación entre o entorno doméstico e o urbano son algúns dos alicerces sobre os que se sostén esta exposición.
A min gustoume.

desenho_industrial3.jpg

Ligazóns relacionadas:

Na Fundación Pedro Barrié de la Maza organizan actividades didácticas para escolares.

En soitu.es tes unha galería con algúns dos obxectos expostos que se poden atopar polas rúas holandesas.

Se queres saber máis sobre os estudos de Enxeñería Técnica en Deseño Industrial podes consultar na web da Universidade da Coruña .…

Vaixela eléctrica

Cada día aparecen novos gadgets que incorporan a electrónica a obxectos que nunca a precisaron. De feito a electrónica non fai máis que ocupar cada vez máis espazo nas nosas vidas.

Agora parece que chegou a hora de incorporarse ás nosas mesas, xusto debaixo dos alimentos.

plate1.jpg

Drach e Dov ganchrow incorporan aos pratos un conductor metálico serigrafiado sobre a cerámica, de xeito que se conectamos unha fonte eléctrica xérase a enerxía calorífica necesaria para manter os alimentos quentes, todo iso sen deixar de lado un bo gusto na decoración.

plate2.jpg plate3.jpg

Neste caso a decoración resulta ter unha utilidade a maiores da puramente estética, ou a resistencia ten forma artística e decorativa, segundo se queira ver. De novo arte e tecnoloxía camiñan xuntas.…