Materiais e procesos

materiais e procesos de fabricación

Low-Tech Factory. Repensando a fabricación.

por

Teño que recoñecer que sinto unha especial debilidade polas máquinas absurdas e improdutivas que teñen como única finalidade a intervención artística e invitar á reflexión.

Grazas a designboom.com descubrín o traballo do grupo “Low-Tech Factory” formado por estudantes de Deseño Industrial de ECAL/University of Art and Design Lausanne.

Mediante unha serie de máquinas reinterpretan e exploran os procesos de fabricación de diversos produtos, experimentando técnicas de moldeado, termoconformado ou punto para a fabricación de gorros, bolsos, lámpadas, … e incluso flocos de millo. Non son máquinas produtivas que sirvan para instalarse en grandes fábricas, desde logo, a idea é recrear e valorar o proceso polo que se crea un produto, retardar o proceso de fabricación para que se converta nun espectáculo que poda ser apreciado e recoñecido.

Unha das obras é a máquina de flocos de millo, que produce unha única “palomita” cada vez. Un proceso que xeralmente se produce en masa é illado para que se converta nun espectáculo, producindo unha satisfacción visual e gastronómica.

[ECAL Low-Tech Factory/Oncle Sam from ECAL on Vimeo.]

Outro curioso traballo é a randeeira-tecedeira. Ao balancearse móvense unha serie de engrenaxes que poñen o equipo de tecer a funcionar, e pouco a pouco vai facéndose un gorro de la.

[ECAL Low-Tech Factory/Rocking-Knit from ECAL on Vimeo.]

Se che interesa a arte da fabricación improdutiva, neste vídeo podedes ver outros traballos de ECAL Low-Tech Factory:

[ECAL Low-Tech Factory from ECAL on Vimeo.]


Cogomelos. Unha ollada á automatización industrial.

por

No supermercado vemos bandexas de cogomelos todos igualiños, orientados do mesmo xeito e co rabo da mesma lonxitude. Podemos imaxinarnos unha fábrica cunha chea de traballadoras e traballadores dedicándose intensamente a clasificar, cortar e ordenar os cogomelos en bandexas para preparalos para a comercialización, pero o máis seguro é que non sexa así. Hoxe en día as fábricas están intensamente automatizadas e unha parte moi importante das tarefas son realizadas por máquinas que funcionan coordinadas entre si mediante complexos sistemas de control.

Mirade este vídeo e observade como é o proceso dunha fábrica de cogomelos, onde está automatizado o cultivo, colleita, clasificación por tamaños, orientación, corte e paletizado dos ricos “champis”, conseguindo unha produción de dúas toneladas por hora.

[youtube: Champignons – (Mushroom machine) – Havatec BV]

 

 

Actualización 15/10/2012: Se preferides os cogomelos naturais aos industriais, non hai máis que ir ao monte a buscalos agora que estamos no outono, pero sempre con moito coidado de identificalos ben, non vaia ser que sexan velenosos. Para axudarnos a identificalos hai unha aplicación para móbiles android chamada Micokey, que descubrín grazas a Mallando no Android. A aplicación MicoKey comprende as 255 especies máis comúns de Galicia, incluíndo fichas con imaxe e datos de polo menos cen destas especies. Nas vindeiras actualizacións incluirán máis fichas detalladas.

De tódolos xeitos, se tedes dúbidas, cómpre sempre consultar a algunha persoa experta. Non comades cogomelos collidos no campo sen ter a seguridade de que son comestibles.


Materiais que engordan cando se estiran

por

Cando sometemos un material a un esforzo axial de tracción observamos como sofre unha redución da súa sección transversal. Pola contra, cando aplicamos un esforzo axial de compresión observamos como a súa sección transversal aumenta. É dicir, cando estiramos o material faise máis fino e cando o comprimimos faise máis groso.

Isto é algo que vimos ao estudar os ensaios de tracción e compresión, e parécenos do máis lóxico. Porén, non todos os materiais se comportan así. Os materiais auxéticos caracterízanse por comportarse xusto de xeito contrario: Fanse máis grosos cando se estiran e máis finos cando se comprimen. Podes velo neste vídeo:

[youtube: The strange behaviour of auxetic foams]

Estes materiais son sintéticos e presentan un coeficiente de Poisson negativo.

Por teren unhas propiedades mecánicas fóra do normal as aplicacións dos materias auxéticos son moi interesantes. Por exemplo en medicina permiten que sexa máis doada a introdución de implantes ou sondas para abrir vasos sanguíneos, pois fanse máis finos ao empurralos. Tamén teñen aplicacións en procesos de envasado, roupa de seguridade, seda dental, etc.

Xa sabes, non afirmes con rotundidade que ao estirar un obxecto estréitase, pois podes ter ao teu redor algún obxecto fabricado cun material auxético e podes quedar mal.


Mascando plástico

por

Cando vos metedes un chicle na boca, non facedes outra cousa que mascar un plástico ao que se lle engaden unha serie de edulcorantes, aromas e colorantes.

Un dos polímeros plásticos máis utilizados para a elaboración de chicles é o acetato de polivinilo (PVA) que tamén é o compoñente principal da cola branca para a madeira, algunhas pinturas e adhesivos.

Orixinalmente utilizábase como base a savia gomosa natural da árbore Manilkara zapota, pero hoxe en día os polímeros plásticos sintéticos constitúen a base da práctica totalidade dos chicles que se comercializan.

Neste vídeo podes ver o proceso de fabricación da goma de mascar:

[youtube: Cómo lo hacen. Goma de mascar]

 

Calcúlase que a nivel mundial as persoas mascan unhas 560.000 toneladas de chicle ao ano.

Pensade que se trata dun polímero plástico sintético que non é biodegradable, polo que se o tirades ao chan vai quedar alí para sempre a non ser que se limpe,  tarefa que non é nada fácil e que fai gastar aos concellos miles de euros en limpeza.

Non vos parece unha porcallada atopar as rúas cheas de chicles pegañentos?


Cortando metal

por

O que se ve neste vídeo non é un coitelo levándose por diante un anaco de manteiga ou de queixo, aínda que ben o parece. O vídeo amosa a cámara lenta e a gran aumento o que sucede cando unha máquina de corte actúa sobre diferentes tipos de metais.

[youtube: Iscar Chip Formation] (Visto en : la boite verte)

Aquí podemos ver a cámara lenta como se comporta o aceiro cando se fura cunha broca:
[youtube: OSG Mega Muscle Drill]

Tamén vimos hai tempo o aceiro derreterse coma se fose chocolate.