Circuíto oleohidráulico

Para os de 2º de bacharelato: Non vou acceder á vosa petición de publicar aquí as preguntas do exame de mañá (bo intento!), pero xa que o pedistes vou darvos unha pista: Unha das cuestións vai sobre o seguinte circuíto oleohidráulico.

[Animación flash de uclm.es]

Agora só falta que a alguén se lle ocorra vir por aquí e miralo…

Coma sempre, o que máis vale son os problemas: Haberá un problema de hidráulica con varios apartados, un problema de regulación e control (eses bloques que tanto odiades), un problema de motores eléctricos e un exercicio de cuestións teóricas e de razoamento, entre as que se atopan un par de preguntas sobre o circuíto anterior.

Sorte!


Dirección asistida

Hai pouco preguntoume alguén en clase como funciona a dirección asistida. Como respondín un pouco polo aire vou intentar contárvolo cun pouquiño máis de detalle.

A dirección:

En primeiro lugar hai que saber como funciona a dirección: Ao xirar o volante, mediante o mecanismo piñón-cremalleira conseguimos desprazar unha barra dentada, que fará xirar ás rodas.

Agora o que necesitamos é algún sistema que nos axude a facer este movemento reducindo o esforzo que teñamos que facer ao mover o volante. Principalmente temos dous sistemas: oleohidráulico e eléctrico, que van a actuar sobre a barra que ten a cremalleira, desprazándoa horizontalmente.

O sistema hidráulico:

O sistema hidráulico ou oleohidráulico consiste nun cilindro de dobre efecto acoplado á barra da cremalleira. Segundo sexa o xiro do volante, unha válvula rotativa conduce o aceite ao cilindro facendo mover o pistón nun sentido ou no contrario.

Neste fragmento do vídeo (do minuto 3:20 ata o 4:39) explícannos como funciona:


[youtube: PFC Roberto Isasa. Direccion asistida de cremallera. Part 1/2]

O sistema electromecánico:

O sistema electromecánico consiste en acoplar un novo piñón á cremalleira, pero esta vez movido por un motor eléctrico.

lectromec-funcion-esq.jpg

Necesitamos uns sensores que nos indiquen como son as condicións do entorno, e unha unidade de control que procese os datos e lle dea ás ordes ao motor.

Entre os sensores atopamos o sensor de ángulo de dirección, que detecta os graos que xira o volante, e o sensor de par de dirección, que mide o par de forza exercido.
Tamén se teñen en conta outros datos coma, por exemplo, a velocidade de marcha do vehículo, xa que necesitamos máis axuda a baixas velocidades.

En función dos sinais de entrada procedentes dos sensores, a unidade de control calcula as necesidades momentáneas de servoasistencia para a dirección, e calcula para cada instante a intensidade de corrente excitadora do motor eléctrico.

Neste vídeo explican de forma moi completa como funciona a dirección asistida electricamente:


[youtube: Direccion Asistida Electricamente EPS (Electrical Powered Steering) ]

 


Como se constrúen as vías do tren

Agora que andamos a voltas coas obras do AVE non está de máis saber como se constrúen as vías.

Seguindo perfectamente os planos trazados polos topógrafos, comézase poñendo uns puntos de marcaxe que delimitan a área de traballo. Unhas máquinas encárganse de botar balasto, ou pedras de roca silícea que serve para absorber a tensión e o ruído do paso do tren e drenar a auga de choiva.

Enriba da capa de balastro colócase unha vía temporal pola que circularán os vagóns encargados de transportar e colocar as travesas e vías definitivas. As travesas, fabricadas de formigón, serven para manter constante a distancia entre os raís delimitando o ancho da vía, e actúan tamén coma illantes eléctricos.

Unha vez colocadas as travesas, vanse colocando e amarrando os raís e outros equipamentos técnicos, e cando está todo rematado fanse unha serie de probas de estabilidade e de carga antes de que se lle dea o visto bo para o paso dun tren.

Neste vídeo pódese ver como cambian unhas antigas vías por outras novas:


[youtube: Werktrein in Overpelt.wmv]

(Vía: Un correo do meu pai)


Ciclos termodinámicos Otto e Diesel

Para o alumnado de Tecnoloxía Industrial II: Aquí tedes unhas animacións dos ciclos termodinámicos teóricos dos motores de gasolina e diesel. Debedes repasar antes o funcionamento destes motores.

As fases de admisión e de escape non pertencen ao ciclo termodinámico, pero poñémolas no diagrama para relacionalo co ciclo mecánico.

Ciclo Otto (Motor de acendido por chispa)


Animacións: a) EUIT Forestal UPM b) EUITA

0 → 1 . Admisión: Isóbara

A válvula de admisión ábrese permitindo a entrada da mestura de aire e gasolina, desprazándose o pistón desde o punto morto superior (PMS) ata o punto morto inferior (PMI), é dicir, desde V2 ata V1 a presión constante P1.

1 → 2 . Compresión: Adiabática

As válvulas de admisión e escape están pechadas, e o pistón móvese desde o PMI (V1) ata o PMS (V2) comprimindo a mestura.
Dita compresión provoca un aumento de presión (de P1 a P2) e un aumento de temperatura, pero non hai intercambio de calor co exterior.
Para realizar este proceso temos que aportar un traballo ao sistema, que será negativo (Win<0).

2 → 3 . Explosión: Isocora

No punto 2 orixínase o acendido da mestura de combustible. Esta combustión fai que a presión aumente bruscamente desde P2 ata P3 manténdose o volume constante e producíndose un aumento da temperatura.
Nesta etapa prodúcese unha cesión de calor do combustible ao motor ( Qabs>0).

3 → 4 . Expansión: Adiabática

Debido á explosión, os gases da combustión expándense no cilindro, provocando que o pistón pase desde o PMS (V2) ata o PMI (V1). A presión e a temperatura descenden (de P3 a P4, e de T3 a T4).
Durante este proceso a enerxía térmica liberada durante a combustión transfórmase en enerxía mecánica. O motor aporta un traballo positivo (Wout>0).

4 → 1 . Apertura da válvula de escape: Isocora

Cando o pistón se atopa no PMI ábrese a válvula de escape, provocando un descenso da presión (de P4 a P1) e da temperatura.
Nesta etapa libérase calor ao exterior (Qced<0).

1 → 0 . Escape: Isóbara

Durante a carreira de escape o pistón pasa desde o PMI (V1) ao PMS (V2) á presión atmosférica P1 expulsando ao exterior os produtos da combustión.

Ciclo Diesel (Motor de acendido por compresión)


Animación: EUITA

As etapas son as mesmas que no caso anterior, pero varía a etapa de combustión-inxección. Nesta etapa prodúcese unha cesión de calor do combustible ao motor (Qabs) a presión constante, a diferenza do ciclo Otto, onde se fai a volume constante.

0 → 1 . Admisión: Isóbara

1 → 2 . Compresión: Adiabática
Para realizar este proceso temos que aportar un traballo ao sistema, que será negativo. Win<0

2 → 3 . Inxección-Combustión: Isóbara

No punto 2 Prodúcese a inxección do combustible provocándose de seguido a combustión do mesmo. Esta combustión produce un aumento da temperatura e volume a presión constante P2.
Nesta etapa prodúcese unha cesión de calor do combustible ao motor Qabs>0.

3 → 4 . Expansión: Adiabática
O motor aporta un traballo positivo Wout>0

4 → 1 . Apertura da válvula de escape: Isocora
Nesta etapa libérase calor ao exterior Qced<0.

1 → 0 . Escape: Isóbara


Motores de combustión interna

Cando pensamos nun motor o primeiro no que pensamos é no clásico motor alternativo de 4 tempos con 4 cilindros, pero hai moitos outros modelos. Imos ver uns cantos.

4-Stroke-Engine.gifMotores de 4 tempos:

O motor alternativo de combustión interna aproveita a forza expansiva dos gases inflamados no interior dun cilindro para proporcionar así o traballo útil necesario para a propulsión mecánica.

motor4tempos.gif

Poden ser motores de acendido por chispa (Gasolina) ou motores de acendido por compresión (Diésel). Xa vimos en clase os tempos e diferenzas, e aquí póñovos uns vídeos nos que podemos ver mais detalles:

[youtube playlist: Motor4tempos]

motor2t2.gif

Motores de 2 tempos:

O motor de dous tempos é un motor térmico de combustión interna con acendido provocado que realiza as catro etapas do ciclo termodinámico (admisión, compresión, expansión e escape) en dous movementos lineais do pistón (1 volta do cegoñal). Utilízase en motores foraborda, motocicletas, motoserras, etc.

Como complemento á explicación vista en clase tedes estes vídeos:
[youtube playlist: Motor2tempos]

Aquí tedes outras animacións: 2tiempos e 2tiempos_valvula.

Radial_engine_WACO_QCF2.jpg

Cantos cilindros?

Aínda que a maioría dos automóbiles utilicen 4 cilindros colocados paralelamente, existen múltiples disposicións posibles.
Por exemplo, en coches de alta gama podemos atopar motores de 6 ou 8 cilindros, e na Fórmula 1 o regulamento marca que deben ser de 8 cilindros en V.

A disposición dos cilindros tamén varía. Podédelo ver neste vídeo:

[youtube: Balance of I.C.Engines]

Os motores radiais ou en estrela que aparecen ao final do vídeo utilizábanse en aviación ata a aparición do motor a reacción.

Nesta animación, por exemplo, podes ver a disposición dos pistóns nunha Harley Davidson

Wankel_Cycle_anim_es.gif

Motor rotativo Wankel

O motor Wankel é un motor de combustión interna con pistón rotatorio en forma de triángulo equilátero de lados curvilíneos que se move no interior do estátor. Unha coroa dentada no interior do rotor fai mover un piñón solidario co eixe do motor.

Aquí podedes ver uns vídeos co funcionamento:

[youtube playlist: MotorWankel]