Fabricación dun automóbil

O xoves que vén imos de visita a PSA Peugeot Citroën, en Vigo.

Hai tempo na web de Citroën tiñan unha estupenda animación na que se vían todas as fases do proceso de fabricación, pero por desgraza xa non está. Porén, hai moitos vídeos en Internet nos que se amosa o proceso. Aquí tedes algúns, pero lembrade antes as fases do proceso de fabricación dun automóbil:

1. Embutición:A partir de chapa galvanizada confórmanse as distintas pezas da carrocería. Primeiro córtanse as pezas e despois embútense mediante grandes prensas. Foto 4
2. Soldadura:As distintas pezas de chapa únense mediante soldadura láser ou por puntos eléctricos. É a parte máis robotizada do proceso. feraxe
3. Pintura:As carrocerías sométense a tratamentos que as protexen da corrosión e píntanse. Realízase tamén mediante robots, pero nós non imos ver esta parte. pintura
 4. Montaxe:Colócanse a portas, taboleiro de mandos, asentos, parabrisas, rodas, motor, etc.  montaxe
5.  Control de calidade.

Vídeos da fabricación dun automóbil:

[youtube: PSA Peugeot Citroën Fabricación de un automóvil.]

[youtube: Citroën C-Elysée Fabricación – PSA Peugeot Citroën Vigo]

[youtube: Cómo se fabrica un coche]

Vídeo de robots industriais traballando en distintos sectores:

[youtube: Robots industriais traballando]


Programación e robótica en galego

Con motivo da celebración do V Día da Ciencia e da Tecnoloxía en Galego temos varias actividades interesantes para participar desde os departamentos de tecnoloxía dos centros de educación secundaria:

Videoconferencia sobre programación en galego

foto_manuel_caeiroaO vindeiro mércores 5 de novembro, a Coordinadora Galega de Equipos de Normalización e Dinamización Lingüística (CGENDL) convida ao alumnado de 2º ciclo de ESO e Bacharelato a participar nunha videoconferencia sobre programación en galego. O relator é Manuel Caeiro, doutor en enxeñaría de telecomunicación na Universidade de Vigo, que falará da historia da programación desde un punto de vista moi básico e práctico e nos animará a programar en galego a través de ferramentas como Scratch e Squeark.

Tedes toda a información na web da CGENDL

En http://codigooctopus.org tedes unha chea de exemplos de programas en galego realizados con Scratch.

Concurso “Inventa en galego”

igaciencia2014aNeste concurso organizado por Igaciencia e patrocinado pola Secretaría Xeral de Política Lingüística e EducaBarrié grupos de alumnos e alumnas deberán desenvolver unha aplicación para móbiles e tabletas Android utilizando App Inventor. O prazo límite de presentación de traballos é o 9 de novembro de 2014

Tedes máis información na web de igaciencia: Inventa en galego

Concurso “Sensores para todos”

Tamén desde Igaciencia, co patrocinio de Educa Barrié e a Domus, invítannos a desenvolver aplicacións de robótica con Lego e Arduino para recoller datos cos seus sensores e representar os resultados obtidos. Recolleranse os traballos ata o 9 de novembro.

Tedes máis información na web de igaciencia: Sensores


Captives. Escultura e robótica

Cando Michelangelo esculpiu a serie de esculturas inacabadas coñecidas como “Os escravos” ou “Os prisioneiros ” utilizaba o método da talla directa: Primeiro facía uns bosquexos e despois introducía as súas ferramentas no mármore de forma manual. El mesmo dicía “Dentro do bloque está a figura, o único que fago é arrincar coa ferramenta a pedra que sobra ao redor desta, ata que a figura queda liberada da súa envoltura.”

Neste caso non liberou completamente as figuras, que quedaron prisioneiras, atrapadas no mármore que as encerraba completamente.

captives141
Prigioni – (1513-1534) – Michelangelo

O artista italiano Davide Quayola acaba de presentar no festival Ars Electronica a súa interpretación contemporánea da serie “Prigioni” de Miguel Anxo. As esculturas xa non se fan en mármore, senón en polietileno expandido (EPS de alta densidade) máis coñecido como poliexpán, e non son unhas mans cun martelo e un cicel quen as esculpe, senón un robot industrial controlado por ordenador.

Captives – (2013) – Davide Quayola

Nun mundo dixital as máquinas encárganse da técnica, pois manualmente non podemos alcanzar a precisión do fresado CNC, e a creatividade, a imaxinación e a arte céntranse no deseño dixital, un debuxo en 3D que un robot sexa capaz de interpretar.

Nos seguintes vídeos amósase o proceso escultórico no que se visualizan as funcións matemáticas que forman parte do “pensamento” do robot escultor.

[Captives – Robotic Milling from Quayola on Vimeo.]

[Captives – Robot session]

Nesta páxina podedes ver máis imaxes da obra “Captives” de Quayola

 


RoboCup 2014

Xa rematou o mundial de fútbol, pero no mesmo Brasil comeza o 19 deste mes outro torneo máis importante desde o punto de vista tecnolóxico: RoboCup 2014.

A RoboCup foi fundada en 1997 co principal obxectivo de “desenvolver ata 2050 un equipo de Fútbol de Robots capaz de gañar ao equipo humano campión do Mundial da FIFA“.

Desde logo que o reto é ambicioso, pero non pensedes que a única motivación é gañar un simple partido entre robots e humanos, por complicado que sexa, senón que detrás de todo isto está o interese por estimular a investigación e o desenvolvemento dunha ampla gama de tecnoloxías que permitan aos robots actuar de forma autónoma e coordinada: Integración entre electrónica, mecánica e informática, intelixencia artificial, aprendizaxe e toma de decisións, desenvolvemento de sensores, procesamento de imaxe en tempo real, recoñecemento de patróns, coordinación e comunicación entre robots, etc.

A RoboCup hoxe en día abrangue outras ligas amais da do fútbol: A RoboCup Rescue promove o desenvolvemento de robots capaces de intervir en situacións de desastre ou nun ambiente hostil, na RoboCup Home os robots deben saber desenvolverse en escenarios realistas e cotiáns, como o ámbito doméstico, a RoboCup Work promove a investigación e desenvolvemento de robots para aplicacións industriais, a RoboCup Logistics ten coma obxectivo desenvolver sistemas de robots auto-organizados que sexan capaces de resolver problemas de procesamento, transporte e distribución de pedidos, e non pode faltar a RoboCup Junior, unha iniciativa cuxa finalidade é achegar a robótica a estudantes de educación primaria e secundaria.

Nestes vídeos podedes ver en que consiste a competición:

Vídeo promocional RoboCup Brazil:
[youtube:RoboCup Overview]

Vídeo promocional da anterior edición de 2013:
[youtube:RoboCup 2013 Trailer ]

Este cóntanos a historia das competicións de fútbol entre 1997 e 2011
[youtube:RoboCup Robot Soccer History 1997 — 2011]


Código Octopus

Xa está na rede Código Octopus, a web de programación multidisciplinaria con Scratch na Educación Primaria e Secundaria.

Scratch é unha interesantísima ferramenta para aprender a programar e que se pode utilizar en calquera materia desde educación primaria, ESO, Bacharelato ou FP. En Código Octopus podedes atopar múltiples exemplos de programas, xogos, e proxectos para realizar con Scratch, e interesantes ferramentas de avaliación.

Botádelle unha ollada á web de Código Octopus. Se queredes tamén podedes seguir o proxecto por twitter e Facebook.