Tecnoarte

Arte e tecnoloxía

Música coa Game Boy

por

A Game Boy non serve só para xogar, tamén pódese facer música con ela, como podes ver neste vídeo de Sebastián Bender: (Visto en Ilustrae)

[youtube: GAME BOY MUSIC (but not the kind you’re thinking of)]

Hai tempo vimos tamén como se pode facer música co son das ferramentas

A idea é crear música a partir dos sons atopados no entorno. Xa non fan falta instrumentos musicais!
Pode servir de idea de proxecto para facer, por exemplo, cando se traballa a edición de vídeo na materia de informática, e mellor se podemos contar co asesoramento do profesorado de música.

Alguén se anima a facer unha composición propia?


ArtFutura 2010. Programa audiovisual no Marco (Vigo)

por

Comeza a edición 2010 de ArtFutura, o festival de Cultura e Creatividade Dixital que explora os proxectos e as ideas máis importantes xurdidas no panorama internacional do new media, o deseño de interacción, os videoxogos e a animación dixital. As súas actividades, que se desenvolverán en varias cidades simultaneamente, inclúen conferencias, talleres, instalacións, exposicións e actuacións en directo.

En Vigo poderemos asistir ao programa audiovisual, que terá lugar no Marco (Museo de Arte Contemporánea de Vigo) a partir de mañá, 4 de novembro.

A edición deste ano ten como protagonista o documental ‘We Live in Public’, un filme sobre as redes sociais e a privacidade en Internet, gañador da pasada edición de Sundance, e que forma parte da colección permanente do MoMA de Nova York. Aquí vai o trailer:


[We Live In Public TRAILER from We Live in Public on Vimeo.]

Podédelo ver no Marco mañá xoves 4, o venres 19 e o sábado 20 de novembro, no programa A.

E se vos gusta a animación 3D, non vos perdades o resto de proxeccións dos programas B, C e D, como 3D ArtFutura Show ou Futura Graphics.

Esta é unha das curtas que se vai proxectar: Salesman Pete de Marc Bouyer, Max Loubaresse e Anthony Vivien.


[Salesman Pete from Salesman Pete on Vimeo.]

Consulta aquí o programa completo no Marco


As máquinas de Kristoffer Myskja

por

Dando unha volta por designboom.com atopei a Kristoffer Myskja, un artista noruegués que non deixa indiferente a ninguén cos seus orixinais autómatas.

Dádevos unha volta pola súa web, onde podedes ver fotos e vídeos do seu traballo, entre eles unha orixinal máquina de fumar, que supoño que necesitará saltarse a lei antitabaco para ser exposta na sala dun museo. Non vos perdades o vídeo.

cig4.jpg

Ten outras interesantes obras, nas que xoga co son, coa mecánica e coa electrónica.

kristoffermyskja1.jpgkristoffermyskja3.jpg
kristoffermyskja4.jpgkristoffermyskja2.jpg


Scan Toys: Unha mirada ao interior dos xoguetes

por

Preguntácheste algunha vez que teñen por dentro os xoguetes?
É boa cousa coller un desaparafusador para desmontar os obxectos e miralos por dentro, pero para quen non se atreva a facelo por se non os dá montado de novo existe a opción de miralos con raios X.
Mónica Rojas e Hernán Eliaschev propóñennos unha mirada ao interior dos xoguetes a través do seu traballo Scan Toys.


[Flickr:scantoys]


Instalacións tecnoartísticas en VigoTransforma

por

Xa queda menos para o VigoTransforma, festival en Vigo que “nace como un espazo de participación, convivencia e interrelación de diversas disciplinas artísticas dentro dun ámbito urbano.”

O venres 9 e sábado 10 de xullo haberá concertos no Peirao dos Transatlánticos, pero destaco aquí as instalacións, performances e obradoiros tecnoartísticos da sección chamada Vasos comunicantes, que se desenvolverá dende o venres 2 ata o sábado 10 de Xullo.

Na Rúa do Príncipe, na Praza da Estación e na Porta do Sol poderemos ver as instalacións “Communication Breakdown” e “Peep Show” de Giles Walker, que crea robots e esculturas cinéticas a partir dos materiais que atopa en despezamentos de toda Europa.


[youtube: Giles Walker’s Homeless Robot Project]


[Peep show by Giles Walker from alg-a on Vimeo.]

Se o que che gusta é crear imaxes, a partir do 5 de xullo na Casa das Artes teremos “Body Paint” de Mehmet Akten. Mediante ferramentas de programación este artista desenvolve instalacións interactivas en gran formato.


[“Body Paint” Installation at “Clicks or Mortar”, March 2009 from Memo Akten on Vimeo.]

Se queredes xerar e manipular son podes asistir o 2 e o 3 de xullo na Praza do Rei a “Augmented Sound” de Berio Molina. Trátase dun sistema que xoga cos límites físicos dun obxecto, as súas características sonoras e a interactividade coa xente.


[Augmented sound lo lab alg-a from berio on Vimeo.]

Seguindo con son, podedes descubrir novos instrumentos como o “Aquófono” de Parto, que estará na Casa das Artes o 7 e o 8 de xullo. Trátase dun xerador de son cuxo funcionamento está baseado en auga e electricidade, un innovador instrumento de percusión con líquidos


[youtube: aquofono]

Isto é só unha pequena selección. Para ver o programa completo de “Vasos Comunicantes” vai á web oficial.

E se aínda non te atreviches a migrar a Linux, no Instituto Camoes vai haber un obradoiro de Olho Livre onde te poden axudar.