ProtoShield

Estes son os pasos a seguir para montar o circuíto do mClon nunha protoShield como a da imaxe

Podes facer todas as conexións con cables Dupont ou, se o prefires, utilizar cables unifilares do tamaño preciso para a protoboard e así ter menos cables enredados por fóra, pois hai moitas conexións e ao final queda un pouco embarullado.

Usaremos sempre cables vermellos para Vcc e cables negros para GND. No caso de que non teñas suficientes, usa cables laranxas para Vcc en grises para GND. Se utilizas unhas cores concretas para cada cousa no caso de que se desconecte un cable coa manipulación do robot resultará máis doado identificalo para conectalo no lugar correspondente.

As conexións sobre unha protoboard son como as que se ven na imaxe da dereita. Os compoñentes que conectes nunha mesma liña vertical estarán conectados entre si.

Antes de empezar, lembra que debes soldar un cable ao pulsador do shield, tal e como explicamos no apartado de pasos previos.

1. O Driver de motores

Esquema xeral

Imos conectar o seguinte esquema electrónico do controlador de motores e o inversor. Explicaremos paso a paso como facelo.

Situación dos compoñentes na protoboard

Conectamos o driver e o inversor tal e como se ve na imaxe. Imos deixar unha liña de buratos á esquerda para a alimentación e outra liña no medio para outras conexións que necesitemos facer.

Imos habilitar buratos para a alimentación. Para iso conectaremos un cable vermello desde 5V ata a tira superior esquerda e un cable negro desde Gnd ata a tira inferior esquerda. Se consideramos os buratos que temos no propio shield, á dereita, imos ter unha chea de buratos para alimentar os diferentes compoñentes do mClon.

  

Alimentamos o driver e o inversor

O seguinte paso é conectar os elementos á alimentación.

No driver hai tres pins que podes conectar a GND. Con usar un só é suficiente, non os tes que conectar todos. Nós eliximos o indicado na figura.

Se no canto dunha placa RobotDyn UNO usas unha Arduino UNO, que non ten o pin A7 para conectar o pulsador, convén conectar un interruptor no pin StandBy do driver, para poder apagar e acender os motores a vontade.

Conectamos os pins de velocidade e sentido de xiro

No seguinte esquema tes o que imos conectar a continuación:

Quitamos da imaxe as conexións anteriores para ver mellor o que temos que facer, pero ti non quites cables. O que xa tes conectado segue conectado.

Empezamos polos pins de control do motor A e, a continuación, os do motor B.

Conectamos os motores

Agora só falta conectar os motores. É importante que te fixes na polaridade. O sinal que vai aos motores debe estar invertida, xa que están colocados en sentido oposto. Para que as dúas rodas xiren cara adiante un dos motores deberá xirar nun sentido e o outro en sentido contrario.

Unha vez feitas todas as conexións teremos un cableado como o da imaxe seguinte.

Verás que está aínda sen conectar a alimentación dos motores VM do driver. Isto deixarémolo para o final, pois dependerá do tipo de alimentación que utilices para o mClon.

2. Os sensores de liña

Os sensores de liña están colocados no mClon como aparece na seguinte imaxe. Cada un ten tres cables: dous de alimentación (Vcc e Gnd) e un de datos. O pin de datos do sensor esquerdo vai conectado ao pin dixital D9 da placa, e o do sensor dereito ao pin dixital D10. Para conectar os cables de alimentación debes buscar buratos libres nos zócalos Vcc e Gnd do shield.

Ollo, segundo o fabricante os pins poden estar á inversa de como aparece na foto. Mira ben a serigrafía antes de conectar.

(Enténdase esquerdo e dereito coma se mirásemos estando enriba do robot, conducíndoo)

3. o sensor ultrasónico

Para conectar o sensor ultrasónico debes unir previamente os pins Trig e Echo. Podes utilizar unha clema ou soldar os pins entre si. Eses pins unidos conéctanse ao pin analóxico A3 da placa e os outros, Vcc e Gnd, nos buratos de alimentación do shield.

4. O pulsador

Imos agora a conectar o pulsador de placa. Isto só é posible se usas a placa RobotDyn UNO. A Arduino UNO non ten habilitado o pin A7.

O esquema é o da figura. Debes utilizar para as conexións unha das tiras de buratos da protoboard que quedaron libres entre o driver e o inversor. Debes pinchar alí os cables brancos que conectamos ao pulsador do shield e ao pin A7 e despois unha resistencia de 10k desde alí ata Vcc.

 

Ollo, debes evitar que as patas da resistencia toquen os pins do controlador de motores. Podes illalas cun pouco de cinta illante para asegurarte.

5. O zumbador

A conexión do zumbador é moi simple. Só hai que conectar dous cables: O marcado como positivo ao pin dixital D8 e o outro a GND.

6. A alimentación

Por último toca conectar a alimentación. Dependendo da opción que elixas (portapilas, powerbank ou powerClon) as conexións varían. Está explicado cada caso na seguinte páxina.

Non te saltes este último paso da alimentación. Lembra que aínda tes o pin VM do driver sen conectar.

 


2 comentarios en «ProtoShield»

  • me resulta complejo la conexión 4. El botón:
    1. Conexión botón verde: sobre la placa azul hay que conectar el cable blanco, pero hay como varios puntos (lo he conectado sobre el segundo, pero no me parece que sea) en el dibujo solo hay uno punto frente al botón verde (en mi placa es negro y encima pone RESET y hay como 5 puntitos de conexión para soldadura). ¿Dónde lo conecto?
    2. Conexión A7: el otro cable blanco va a A7, ¿el punto A7 es de esa línea de soldadura el segundo punto?
    Y el final conexión VM: ¿Dónde está el esquema de conexión?

    Resposta
  • Dependendo da placa poderías encontrar máis dun burato. Sen unha imaxe é difícil axudarte. Antes de soldar, podes comprobalo cun polímetro mirando se hai continuidade entre GND e o burato cando premes no pulsador.

    Para o resto podes utilizar o esquema da imaxe. A resistencia de 10k podes conectala ao VCC do chip inversor, que queda máis cerca e así non tes que cruzar por riba do driver.

    Resposta

Deixa unha resposta

O teu enderezo electrónico non se publicará