apetega

V Mostra de proxectos. Tecnoloxía na Rúa.

por

Vmostradeproxectos.pngA Asociación do Profesorado de Tecnoloxía de Galicia, APETEGA, organiza a súa quinta mostra de proxectos “Tecnoloxía na Rúa“, na que se amosarán os prototipos desenvolvidos polo alumnado de tecnoloxía de diversos institutos de Galicia.

Será o vindeiro venres 12 de xuño de 2009 de 17:00 a 19:30 na Praza do Toural, en Santiago de Compostela.

Para o profesorado de tecnoloxía:

Animádevos a asistir e levar os traballos dos vosos alumnos e alumnas. Sen a vosa colaboración a mostra non é posíbel. Tedes que inscribirvos na web de apetega e alí tedes toda a información sobre a organización do evento.

Para o alumnado de Baiona:

Levarei unha selección dos mellores proxectos que estean rematados nesa data. Se queredes asistir debedes convencer aos vosos pais e nais para que vos leven a dar unha volta por Santiago ese día.

Ademais, este xoves día 4 de xuño veñen visitarnos ao insti os nenos e nenas que cursan 6º de primaria, e no departamento de tecnoloxía queremos facer unha exposicón cos vosos traballos. A mostra será no Taller II. Tedes que poñervos as pilas e intentar deixalos funcionando para ese día.

Aquí tes uns vídeos coas mostras de proxectos de edicións anteriores:

Toda a información na web de APETEGA


IX Xornadas de Tecnoloxía de Galicia

por

Xa vos podedes inscribir nas IX Xornadas de Tecnoloxía de Galicia, organizadas por APETEGA (Asociación do Profesorado de Tecnoloxía de Galicia)

xornadas09.jpgEste ano celebraranse no IES Otero Pedrayo de Ourense os días 24 e 25 de Abril de 2009.

Como nas anteriores edicións, a maior parte do programa estará adicado a obradoiros prácticos. De momento aínda non está publicado o listado de obradoiros que se van ofrecer, pero seguramente teremos cousas moi interesantes.
Eu repetirei o obradoiro de robótica con Lego Mindstorms NXT “Robots en acción!” que din o curso pasado, así que se queredes fochicar cos robots de Lego vémonos alí.

O venres pola mañá temos dúas visitas didácticas: ás instalacións da empresa CIE Galfor e ao Parque Tecnolóxico de Galicia, Tecnópole.

Tamén hai unha interesante conferencia inaugural: “Educar con software libre”, a cargo de Rubén Rodríguez Pérez, director do equipo que desenvolve o sistema operativo Trisquel GNU/Linux.

Tedes a información na web de apetega.


Concurso de cartaces de apetega

por

apetegaA Asociación do Profesorado de Tecnoloxía de Galicia (APETEGA) convoca o concurso para o deseño do cartel anunciador das IX Xornadas de Tecnoloxía de Galicia, dirixido ao alumnado de ESO e Bacharelato dos centros educativos de Galicia.

As xornadas este ano serán os días 24 e 25 de abril no IES Otero Pedrayo de Ourense, e o premio será material electrónico/informático valorado en 150€.
Pódense consultar aquí as bases do concurso.

É unha oportinidade para practicar con programas de deseño gráfico e esmerarse para conseguir o premio.

O noso compañeiro Antonio, do IES Mendiño de Redondela ten publicados no seu blogue algúns videotitoriais de GIMP. (web da aplicación)
Pódense consultar nesta ligazón.

E o noso compañeiro Tucho ofrécenos tamén no seu blogue uns titoriais de InkScape. (web da aplicación). Pódense consultar nesta ligazón

Debedes utilizar imaxes libres ou con licenza creative commons para o deseño do cartaz. Hai un tempo publiquei un post no que ofrecía enderezos de bancos de imaxes que vos poden ser útiles para realizar este traballo.

Sorte no concurso!


IV Mostra de proxectos “Tecnoloxía na rúa”

por

Por cuarto ano consecutivo, APETEGA organiza a mostra de proxectos “tecnoloxía na rúa“. O alumnado e profesorado galego amosa os traballos realizados durante o curso nas aulas de tecnoloxía.

Será o venres 6 de xuño na Praza do Toural, en Santiago de Compostela, de 17:30 a 19:30 horas. Máis información na web de apetega.

Se es profesor ou profesora de tecnoloxía anímate a participar levando proxectos, e se non o es, achégate a botar unha ollada.

Aquí tes uns vídeos das edicións anteriores:

Mostra 2006:

Mostra 2007:


Nova sección de control e robótica

por

robot LEGOAbrín hai pouco unha nova sección de control e robótica, á que podedes acceder dende o panel lateral esquerdo. Aínda está incompleta, pero irei ampliándoa pouco a pouco cando vaia atopando tempo, e centrareime en principio nos contidos de robótica con LEGO, en consonancia co material do que dispoñemos para traballar esta parte do currículo.

Tamén podedes ver unha nova ligazón: Robot-Ingenio. É un blogue no que participamos os catro institutos que estamos no proxecto de robótica que empezamos a poñer a andar este curso. De momento aínda estamos subindo as fotografías e vídeos de presentación, pero iremos subindo proximamente outra información sobre como van transcorrendo as probas.

Mañá nas VIII Xornadas de Tecnoloxía de Galicia impartirei o obradoiro “Robots en acción”, así que se alguén desexa probar a programación de robots LEGO pode apuntarse (máximo 12)