Convocatorias

ArtFutura 2009: 20 anos, da realidade virtual ás redes sociais

por

Hoxe comeza ArtFutura 2009, co título “20 anos, da realidade virtual ás redes sociais”.

No Museo de Arte Contemporánea de Vigo (Marco), os xoves, venres e sábados ata o 28 de novembro, poderemos asistir ao programa audiovisual deste certame, que explora os proxectos e as ideas máis importantes xurdidas no panorama internacional do deseño, os videoxogos e a animación dixital.

Nesta edición de 2009 o programa audiovisual explora os novos tipos de creatividade relacionados coas redes sociais como Facebook e YouTube.

Bo proveito:

[youtube: Western Spaghetti by PES]

Ao longo destes 20 anos ArtFutura, festival de Cultura e Creatividade Digital,  tratou de mostrar que a comezos do novo milenio, arte e tecnoloxía discorren máis que nunca por camiños paralelos.

Xa non é posible entender a arte desligada dos novos media, internet e a tecnoloxía dixital.


[youtube: ArtFutura 2009 – 20 Editions]

Máis información:


Queremos Galego!

por

É terrible que un pobo teña que saír á rúa a defender a súa cultura, pero é o que hai. Hoxe estarei en Compostela na manifestación en defensa da lingua galega convocada pola plataforma Queremos Galego.

queremos_galego.jpg

Porque a lingua galega é cultura, nada máis que cultura, e sen embargo hai xente que a ve con desprezo ou coma unha ameaza, e intenta acabar con ela. A cultura e coñecemento teñen que estar protexidos, porque son patrimonio da humanidade. É triste que haxa que saír á rúa na súa defensa, pero alí estaremos.

Actualización 24/10/2009:
O que alí pasou:


[youtube: Queremos Galego 18-Out.]


Obradoiro “A Maxia da Robótica” e II Concurso galego de Robótica

por

lego_escorpion.gifNa Semana da Ciencia 2009, a Institución Galega de Ciencia (IGACIENCIA) organiza o Obradoiro ‘A Maxia da Robótica’ e o II Concurso galego de Robótica

O hardware utilizado será Lego Mindstorms.

  • Datas: do 9 ao 14 de novembro de 2009
  • Lugar: Casa das asociacións. Avenida de Vilagarcía, 43, Santiago

Máis información e inscrición en IGACIENCIA

– – – – –

Actualización 17/10/09: a actividade ten unha duración de só unha hora, e consiste en prácticas básicas cos robots de Lego, polo que non compensa ir co alumnado de Baiona que se tería que desprazar a Santiago. Ademais xa dispoñemos de robots Lego cos que traballar.

A convocatoria pode ser de interese para os centros de Santiago e arredores, ou centros que non dispoñan de robots Lego e queiran probalos.


Galiciencia 2009

por

logo-galiciencia2009.jpgGaliciencia vén de abrir o prazo de recepción de proxectos ata o 25 de outubro para a súa edición deste ano, que terá lugar no mes de novembro en Ourense

O obxectivo principal desta iniciativa, que Tecnópole organiza desde hai catro anos co patrocinio da Dirección Xeral de I+D+I da Consellería de Economía e Industria, é servir de punto de encontro para rapaces e rapazas da ESO e de Bacharelato con ideas innovadoras e con ganas de mostralas ao público nos stands que Parque Tecnolóxico de Galicia pon á súa disposición durante tres días coincidindo coa celebración da Semana da Ciencia.

En ‘Galiciencia’ teñen cabida dende proxectos experimentais e tecnolóxicos a traballos documentais.

As bases detalladas están á túa disposición neste documento.

Máis información en Galiciencia 2009

– – –
A min parécenme datas malísimas para este tipo de actividades. A final de curso hai un montón de proxectos que se poderían expoñer, pero nestas datas aínda acabamos de empezar. Terano en conta algunha vez?


Concurso de Software Libre

por

concursoSL.pngPor se a alguén lle interesa, o Concurso Universitario de Software Libre é un concurso de desenvolvemento de software, hardware e documentación técnica libre, no que poden participar estudantes universitarios, de bacharelato ou ciclos de formación profesional de grao medio e superior no ámbito estatal español.

Para liberar os proxecto usarase forxa de RedIRIS e un blogue onde cada participante contará a súa experiencia no desenvolvemento durante o curso escolar 2009/2010.

Podes ver aquí as bases da convocatoria.
O prazo de inscrición remata o 7 de novembro

(Grazas Josek pola información)