tecnoloxia.org

Tecnoloxía na Educación Secundaria

Samaín 09

Coma tódolos anos, no insti celebramos a festa do Samaín, con obradoiros de cabazas organizados polo Equipo de Normalización Lingüística e o Ciclo Superior de Animación Sociocultural.

No departamento de Tecnoloxía tamén poñemos o noso gran de area, e invitamos a que os grupos que queiran lles poñan ás cabazas un circuíto eléctrico para acadar efectos de luces, son ou movemento.

Este ano foron poucas as cabazas eléctricas, pois a última hora aínda estaban co baleirado e decoración, pero houbo unhas cantas de 1º e 2º de ESO con lámpadas e LEDs no interior. Incluso un alumno cambioulle á súa cabaza un ollo por unha roda en movemento.

Grazas ao alumnos e alumnas de 4º de ESO Xeila, André, Pedro, Jessica, Sara, Belén e Anxo, por axudar aos máis pequenos coa conexión dos cables. Iso sí, botei de menos algunha cabaza dos maiores, cun circuíto algo máis complexo. Outros anos sempre hai alguén que se anima.

Aquí vai o vídeo:


[youtube: Samaín 09. Baiona]

Música: Matías o Morcego. Os papaqueixos.

Circuítos nas cabazas do Samaín

samain.jpgEste venres no insti celébrase o concurso de cabazas do Samaín.

O taller II de Tecnoloxía estará aberto o xoves 29 no recreo para aqueles alumnos a alumnas que queiran engadirlle un circuíto con luces, son ou movemento á súa cabaza.

Tedes que traer:

  • a cabaza baleira e decorada,
  • unha pila de petaca (4,5 V) e
  • unha bolsa de plástico pequena para protexer o circuíto da humidade do interior da cabaza.

Os compoñentes que necesitedes (interruptores, pulsadores, lámpadas, motores, zoadores, …) deixarémosvolos, pero tedes que devolvelos o venres a última hora de clase ou a semana que vén (se queredes levar a cabaza á vosa casa a fin de semana)

Como os que máis se animan tódolos anos son os rapaces e rapazas de 1º de ESO, que non teñen clase de tecnoloxía, contaremos coa axuda dalgúns alumnos e alumnas de 4º de ESO, que vos ensinarán e axudarán a montar os circuítos e levarán un positivo na nota se fan ben a súa labor de profes.

Circuítos básicos para 1º, 2º e 3º de ESO:

Se queredes colocar varias lámpadas (por exemplo unha en cada ollo), lembrade que deben estar conectadas en paralelo.

O curso pasado un alumno de 1º de ESO fixo unha cabaza moi divertida: Ademais dunha luz interior, púxolle un motor no nariz cun cartón de cores suxeito no eixe, que facía un efecto moi interesante.

emc.jpg paralelo1.gif

Tamén podedes engadirlle son. No taller podémosvos prestar un zoador e un pulsador, pero mirade pola casa, que igual tedes algún xoguete estragado deses que emiten son, como esas bonecas que falan. Pode resultar máis interesante.

paralelo2.gif

Circuítos para 4º de ESO ou bacharelato.

Os alumnos e alumnas de 4º e o de bacharelato xa podedes facer algo virgueiro. Animádevos a poñer a proba as vosas habilidades coa electrónica facendo unha cabaza orixinal.

Que vos parece engadirlle uns ollos intermitentes? (Se queredes que os dous ollos se acendan á vez, só tedes que poñer as dúas lámpadas en paralelo dende o pin 3 ata a masa.)

circ_5552b.gif

Tamén podedes utilizar un sensor de escuridade para que os ollos se acendan automaticamente cando é de noite:

sensor_escuridade1.gif sensor_escuridade.gif

Pensade noutras ideas orixinais e consultádeme para ver se se poden facer facilmente. (O problema é que non imos ter moito tempo)

Para quen se anime:

Que vos parece esta cabaza con LEDs que alumean ao estilo “coche fantástico”?

cabaza.jpg

O deseño é de Evil Mad Scientist Laboratories.

Funciona cunha pila de 9V e utiliza dous circuítos integrados (555 e 4017) que xuntos controlan seis grupos de LEDs. Tedes as intrucións en Evil Mad Scientist Laboratories