tecnoloxia.org

Tecnoloxía na Educación Secundaria

InspiraSTEAM

Cheguei a través do Twitter a unha interesante e necesaria iniciativa promovida pola Universidade de Deusto: InspiraSTEAM, que nace da necesidade de promover vocacións científicas e tecnolóxicas entre as nenas e mozas.

O proxecto ten coma obxectivos, entre outros, dar a coñecer os estereotipos existentes para que non condicionen a elección de estudos por parte das rapazas e concienciar sobre a necesidade de que o desenvolvemento do país se produza entre homes e mulleres.

Estou 100% de acordo no contido do seu manifesto, e penso que cómpre un traballo activo por parte de institucións, organizacións e persoas a título individual para lograr os obxectivos que nel se propoñen. Eu xa asinei, e invítovos a que tamén o fagades vós.
_ _ _ _ _ _ _ _ _ _

Manifesto Inspira

Abrindo espazos a nenas e mulleres en ciencia e tecnoloxía

Vivimos nun mundo global e diverso onde a igualdade non está conseguida en moitos aspectos. Un que nos preocupa e ocupa é a fenda de xénero e a tecnoloxía.

Son feitos demostrados que menos mulleres elixen unha profesión tecnolóxica, menos mulleres traballan no mundo científico/técnico, as mulleres chegan a postos de menor importancia e perciben salarios inferiores en postos de igual relevancia.

Estes feitos non se deben a un menor gusto, a unha menor capacitación, a unha inferior vocación, ou a un inferior desempeño. Son os factores sociais, culturais e educativos os que empoderan, recoñecen e incentivan menos ás mulleres que aos homes. Son os estereotipos, procesos de socialización, roles de xénero, machismos ocultos cos que construímos a educación e a sociedade os que fan crer que as mulleres son menos capaces e os que provocan que as mulleres sexan menos valoradas, social e economicamente.

Esta realidade pódese cambiar, e facelo é relevante. Xogámonos moito. E concírnenos á sociedade no seu conxunto e a cada unha das persoas e entidades que a formamos.

Este manifesto constitúe un compromiso, das persoas e organizacións que se adhiren a el, de traballar activamente pola igualdade entre mulleres e homes no ámbito científico-tecnolóxico, a través das seguintes liñas de acción:

  1. Reflexionar e revisar a falsa crenza de que xa hai igualdade. Coñecer os datos que demostran que esta igualdade aínda non existe e hai moito traballo que facer por conseguila.
  2. Recoñecer publicamente que mulleres e homes temos as mesmas capacidades, dereitos e responsabilidades, e merecemos por tanto o mesmo recoñecemento.
  3. Dar a coñecer as consecuencias da falta de igualdade existente, e traballar para concienciar á sociedade da necesidade de accións positivas para evitalas, promovendo un sistema científico-tecnolóxico responsable e diverso.
  4. Facer visibles ás mulleres científicas e tecnólogas históricas e actuais, pondo en valor o seu traballo e construíndo novos referentes.
  5. Favorecer un contexto social e educativo no que as nenas e mozas se vexan animadas, capaces e recoñecidas para que poidan elixir o seu futuro sen condicionamentos.
  6. Reverter os estereotipos sociais, desmitificando as crenzas sobre os roles de xénero; facilitando información sobre as carreiras científicas e tecnolóxicas; e dando a coñecer o amplo abano de posibilidades profesionais das STEAM (Ciencia, Tecnoloxía, Enxeñaría, Arte e Matemáticas).
  7. Contribuír ao empoderamento das mulleres, desenvolvendo accións en todas as dimensións para conseguilo.

Traballar co prisma de xénero encamíñanos a revisar a igualdade no seu conxunto. Esta actuación é só unha de todas as que teñen que se poñer en marcha. Somos sensibles a outras actuacións, e desde este punto de partida queremos seguir avanzando e profundando na igualdade a todos os niveis.

_ _ _ _ _ _ _ _ _ _

Mías información: http://inspirasteam.net

Tweet about this on TwitterShare on FacebookShare on Google+Email this to someone

En novembro: OSHWDem e Maker Faire Galicia

Este mes temos en Galicia dúas citas moi interesantes para as persoas afeccionadas á tecnoloxía: o día 11 a OSHWDem na Coruña e os días 24, 25 e 26 a Maker Faire Galicia en Santiago de Compostela.

OSHWDem

A OSHWDem (Open Source Hardware Demonstration) é unha feira de tecnoloxía onde se expoñen inventos cun nexo común: todos eles son proxectos libres, é dicir, que as súas especificacións, esquemas e código foron publicados, de forma que calquera poida estudalos, entender o seu funcionamento, replicalos e mesmo melloralos. Atoparás novas tecnoloxías, robótica, arte, Internet das cousas, electrónica, hardware, software, competicións de robótica, etc.

Eu participarei co mural 100Hex de impresión 3D, e está aberto a que calquera participante contribúa nel co seu propio hexágono, coas únicas limitacións de dimensións (60 mm de lado e 2mm de espesor) e cor (branca).

A edición do 2017 celebrarase o día 11 de novembro no Museo Domus da Coruña.

Maker Faire Galicia

A Maker Faire Galicia celebra este ano a súa terceira edición. É unha feira de inventos, un escaparate para a creatividade e o enxeño pensado para todos os públicos e disciplinas: gastronomía, robótica, mecánica, ciencia, arte urbana, música, electrónica, artesanía, etc.  Celebrarase os días 24, 25 e 26 de novembro na Cidade da Cultura de Santiago de Compostela. Podes ver o programa aquí.

 

Non volas perdades!

Tweet about this on TwitterShare on FacebookShare on Google+Email this to someone

Levantando un coche con espaguetes

Agora que andamos co ensaio de tracción en tecnoloxía Industrial vén a conto este reto da Escola de Arquitectura da Universidade CEU San Pablo: Propuxéronse levantar un vehículo de 1200kg con 260 espaguetes, e conseguírono!

Nun ensaio posterior comprobaron que os espaguetes resistiron 1650 kg antes de romper, así que aínda puideron utilizar menos espaguetes na proba, pero non escatimaron en coeficiente de seguridade.

É máis que habitual que os estudantes universitarios de todo o mundo utilicen espaguetes para os seus deseños estruturais. Basta que fagades unha busca “spaghetti bridge” en google para atopar miles de exemplos.

Por que espaguetes? A tensión máxima de rotura do material do espaguete está ao redor de 27,7 MPa e ten un módulo de elasticidade de 1375 MPa, habendo variacións dependendo das características do material. Un espaguete da marca Barilla do nº7 (2mm de diámetro) en tracción resiste uns 80 kg. Sen cocer, claro.

[imaxe de estructurando.net]

Que terá a sémola de trigo duro para ser tan resistente?

Tweet about this on TwitterShare on FacebookShare on Google+Email this to someone