tecnoloxia.org

Tecnoloxía na Educación Secundaria

CircuitLab: Simulador de electrónica online

Decateime da existencia do editor/simulador de circuítos electrónicos CircuitLab esta mañá a través dun tuit de slandete, así que pouco tempo tiven para fozar nel. Con todo, paréceme unha aplicación estupenda, pois a interface gráfica é moi atractiva e intuitiva, polo que me parece moi axeitada para os niveis de educación secundaria, especialmente para bacharelato.

Neste vídeo podes ver como funciona:
[youtube: Getting Started with CircuitLab]

Como puidestes ver no vídeo, CircuitLab permite construír circuítos analóxicos e dixitais, cambiar os datos dos compoñentes, calcular as tensións de saída para un compoñente determinado ou observar o sinal do osciloscopio. Outro aspecto interesante é que se poden compartir os esquemas co resto de usuarios e usuarias.

Un dos inconvenientes é que a listaxe de compoñentes é limitada, e algúns bótanse moito en falta.

Aquí tes un dos circuítos que veñen de exemplo:

Desde logo que é unha sorte contar con este tipo de aplicacións que se executan desde o navegador, e non andar a depender de instalacións de escritorio deseñadas para un determinado sistema operativo (sexa cal sexa). Lembrádevos por exemplo de Logic-Lab ou de logic.ly dos que falei hai tempo.

Cada vez hai máis aplicacións online para facer de todo. Agora só falta unha aposta clara para mellorar a conectividade dos centros de ensino galegos, moitos cun ancho de banda que provoca desacougo, coma é o noso caso.…

O camiño da electricidade

Aquí tedes algúns materiais de apoio aos apuntamentos de clase, e que vos poden axudar a facer os traballos sobre as instalacións eléctricas que tedes nas vosas vivendas.

Xa coñecemos o funcionamento dos diferentes tipos de centrais eléctricas. A enerxía eléctrica xerada nelas debe chegar agora ás nosas casas. O camiño que segue podémolo ver na seguinte infografía de Rede Eléctrica de España, e constitúe o que chamamos rede de distribución pública:

[Red Eléctrica de España: Cómo funciona el sistema eléctrico]

O centro de control eléctrico (CECOEL) é o responsable da operación e supervisión coordinada en tempo real das instalacións de xeración e de transporte. Garante a continuidade e seguridade do subministro eléctrico mantendo en constante equilibrio a xeración e o consumo.

Para entender como funciona podes realizar una visita virtual ou xogar ao xogo “CONTROLA, simulador de control eléctrico“. A misión é manter o subministro eléctrico ante incidencias diversas, controlando la produción das centrais para dar resposta ao consumo en núcleos urbanos e industriais.

A instalación de enlace une a rede de distribución pública coa instalación interior de cada vivenda.

Para comprender agora por onde entra a electricidade nun edificio de varias vivendas temos esta infografía de educarex.es:

[infografía de educarex.es]

A instalación eléctrica interior é a que temos dentro da vivenda. Cada derivación individual chega a unha vivenda a través do Cadro Xeral de Mando e Protección que se atopa á entrada da mesma.

Outro material que pode ser útil é o que nos ofrece digital-text: “Instalaciones de la vivienda

– – – – – – – – – –

Para axudarvos a identificar todo isto nas vosas casas, desde o poste ou desde a acometida ata o cadro de mando e protección, poden servirvos estes documentos de Foremfe Elea, nos que se ilustran as diferentes partes con fotografías:

  1. Caixa de protección
  2. Centralización de contadores
    (Isto válevos aos que vivides nun edificio de varios pisos. Nas casas unifamiliares o que soedes ter é unha caixa de protección e medida. Mirade os apuntamentos de clase.)
  3. Cadro eléctrico de distribución.

 

Orientacións para os traballos:

  • Saca fotografías de todo o percorrido, polo menos desde a acometida, e engádelles descricións aos distintos elementos. Se podes, intenta atopar o poste eléctrico e o transformador de media a baixa tensión.
  • Se decides facer un vídeo, débese escoitar ben toda a explicación.
  • Se o cadro xeral de mando e protección da túa vivenda está sen etiquetar, engade etiquetas identificativas debaixo de cada interruptor.
  • Fixándote no cadro, fai un esquema unificar da instalación.

 

Cando remates o traballo podes botar unha partida ao xogo simulador do centro de control eléctrico “controla”.…

Contidos de electricidade

circuito12

Relé de enganche. Preme nos pulsadores!

Desde que comezou o curso recibín correos e mensaxes de varios profesores e profesoras que botaban de menos os contidos de electricidade que tiña aquí antes das reformas. Desculpade polo trastorno, e aviso de que xa están de novo dispoñibles. A verdade é que como non dou clase este ano a 2º e 3º de ESO non me din moita présa.

Podedes acceder desde o menú superior: Electricidade

Tiña pensado revisalos con maior profundidade e cambiar algunhas cousas, pero dado que hai xente agardando por eles decidín deixalo como estaba e o único que fixen foi corrixir uns problemas que daban algúns scripts co navegador chrome. Penso que agora xa funciona ben, pero se vedes algún problema avisade.

pulsadorNA pulsadorNC

Solución para aforrar enerxía eléctrica

Xa sabedes que subiu o recibo da electricidade, así que hai que ter coidado e non acender máis luces das necesarias.

Josselin Zaïgouche preséntanos unha solución eficaz para non caer na tentación: switch me :-)

switchme.jpg

Xa sabedes, pensádeo ben antes de premer no interruptor, que pagar a factura doe.

(Visto en inspire me now)