Non todo está inventado…
Cando se deseña e constrúe un obxecto ou sistema, a orixinalidade non ten por que estar reñida coa funcionalidade. Aquí tes un exemplo dunha fonte:
(Vía: Inspire me, now!)
Un deseño orixinal pero que non sexa funcional e práctico non vale, a non ser que se trate dunha obra de arte que só persiga chamar a atención.
Tarefa:
– Buscar formas orixinais para obxectos funcionais cotiáns.
– Mellorar a funcionalidade de obxectos de deseño que non vexas funcionais.
O verán é un bo momento para organizar a casa e todos eses trastos que hai dentro e, de paso, darlle un toque persoal. O interesante é deseñar e montar os propios mobles. Hai que ter coidado en calcular ben o despece dos taboleiros e tamén na estabilidade da estrutura, pero cun pouco de imaxinación e unhas ferramentas pódese crear unha estantería moi orixinal. Teño que poñerme antes de que remate o verán. Por se alguén máis está con iso, aquí van algunhas ideas atopadas na rede:
As estanterías modulares válenche para adaptalas a diferentes espazos. Parecéronme moi orixinais estas con módulos que se entrelazan para formar diversas configuracións, inspiradas no tetris ou que desafían a gravidade.
Tamén podemos aproveitar as estanterías para agochar mobles dentro delas, como se pode ver nestas fotos:
Tamén son interesantes algunhas feitas con diferentes materiais, como esta estantería metálica extensible, unha feita cunha goma elástica, ou a feita con divertidos ladrillos de cores.
E que vos parece esta en forma de ecuación matemática? E a que se pode enrolar?
Bueno, eu quédome coa estantería que agocha unha mesa no interior, que sempre pode ser útil para subir á parte alta ou utilizala como moble supletorio. O que non me convence é iso dos estantes inclinados.
Para estantería chula esta de mármore, pero creo que está deseñada para non meterlle nada dentro, que é como queda bonita, e para iso hai que ter unha casa grande con moita parede, que non é o caso.
A tecnoloxía é o campo da actividade humana que responde ó desexo de transformar o mundo que nos rodea na procura de novas formas de satisfacer as nosas necesidades. Cando temos unha necesidade, ideamos, deseñamos e creamos un produto ou servizo que nos permita solucionar o problema inicialmente plantexado.
Existen infinidade de exemplos de múltiples solucións posibles a un mesmo problema ou necesidade. Vou poñer un exemplo de deseño de espertadores, que vai dedicado a todas aquelas persoas ás que lles custa levantarse polas mañás, eu incluída. (grazas a “no puedo creer que lo hayan inventado” pola recompilación de inventos gueeks, frikis e variopintos)
A necesidade:
O espertador clásico non me vale, xa que estiro o brazo, apágoo, e sigo durmindo. Necesito un espertador que me faga levantar e, o máis importante, espabilar.
As solucións:
Nesta galería podes ver algúns deseños, todos coa mesma intención: Nada de apagar o espertador sen máis, deberás agudizar os sentidos e poñerte en marcha.
Ocórreseche algún outro sistema para incorporarlle a un espertador e que nos faga espabilar?
Ante o consumismo desmesurado que impera nestas datas, propoño fabricar regalos artesanais para o Nadal. Aquí van algunhas ideas, pero vale calquera cousa que se faga con material reciclado:
Bonecos con compoñentes electrónicos
Aproveita os compoñentes dunha placa vella dun vídeo ou de calquera outro trebello electrónico estragado para facer simpáticos bonecos coma este da imaxe. Para unir os compoñentes chega con dobrar as patillas con axuda duns alicates. Se non recuperas as patillas dos compoñentes, proba soldar con estaño ou utilizar un pegamento.
Bonecos “aproveitapilas”
Moitas das pilas que tiramos aínda teñen carga suficiente para acender un ou varios LEDs, que necesitan un máximo de 2V. Podes fabricar un boneco coma este para calquera tipo de pila. Os LEDs son bastante económicos (os vermellos custan arredor de 12 céntimos) e os podes conseguir en calquera tenda de electrónica. O resto é botarlle imaxinación. A función do condensador é almacenar carga eléctrica. Podes deseñar un circuíto que o incorpore.
Con LEDs e pilas gastadas podes iluminar calquera obxecto que se che ocorra.
Luces de Nadal
Podes fabricar a túa propia guirnalda de Nadal cuns LEDs. Se non queres utilizar pilas, podes reciclar un cargador dun vello móbil para fabricar a fonte de alimentación. Mide a tensión de saída cun polímetro e busca unha resistencia axeitada que protexa os LEDs (lembra que non deben conectarse a máis de 2 V).
Proba incorporarlle un efecto intermitente a túa guirnalda incorporado un circuíto con transistores ou un circuíto cun 555 en funcionamento astable.
Tamén podes montar un circuíto con LEDs que seguen o ritmo da música. Tes as instrucións nesta páxina
Cousas con ordenadores estragados
Vai ao “punto limpo” do teu concello (se é que ten), e faite con placas de circuítos e tarxetas de ordenador. Bótalle imaxinación e deseña obxectos para aproveitalos, como cadernos, chaveiros, lámpadas, portafotos, … pode ser un regalo moi orixinal.
Recicla CDs ou discos duros para …. pois aí vai a túa imaxinación. Aquí tes unha foto na que se aproveitan os discos duros.
Se reúnes varios microprocesadores podes fabricar una salva manteis coma este da foto. A carcasa dos micros é cerámica, e aguanta ben a temperatura.
Para comer
E se che gustan os doces, podes facer un circuíto electrónico comestible coma este. Un pastel orixinal para unha ocasión especial.
Menos consumo eléctrico
Recicla lámpadas de incandescencia. Sabes que consumen moito, e que hai que empezar a utilizar nas casas lámpadas de baixo consumo.
Convence á túa familia de que as substitúa e aproveita as lámpadas vellas para fabricar adornos ou utensilios útiles. Aquí tes un exemplo de reutilización.
Recorta e pega
Tamén podes descargar uns recortables de papel que non teñen desperdicio. Levará o seu tempo montalos, pero son un curioso obxecto decorativo para regalar.
Reciclaxe de plásticos
Non vos parece unha barbaridade a cantidade de plásticos que tiramos ao lixo? Hai un sitio chamado toynet que nos invita a facer simpáticos bonecos con plásticos reciclados, e tamén describe as características dos distintos tipos de plásticos.
Divírtete estas vacacións!
Xa está publicada a VI convocatoria do premio Galicia innovación Junior
Mozos e mozas de 12 a 18 anos poden presentar un traballo no que se explique a idea dun novo produto, servizo ou maneira distinta e innovadora de producir algo xa existente. O xurado valorará a orixinalidade da proposta, a súa utilidade, a posibilidade de aplicación práctica e o grao de desenvolvemento do proxecto presentado. Cada participante poderá presentar un máximo de dúas propostas.
A data límite de presentación das solicitudes remata o día 31 de xaneiro de 2008.
Animádevos a participar coas vosas orixinais ideas. Podedes gañar un ordenador portátil e unha cámara de vídeo dixital.
Tes toda a información en www.galiciainnovacion.com
